Ny nahafatesan’i Herôda Agripa mpanjaka

²⁰ Romotra mafy tamin’olo tagny Tyriana izy amin’ny Sidoniana i Herôda. Ka nifagnaraka fiena areo agnantogna an’azy, laha nahazo an’i Blasto, mpikarakara ny tragno fandreny mpanjaka ho akaman-dreo ho agny, die nangàtaka fiavanana tamin’i Herôda areo, satria tanin’Herôda no niveloman-dreo. ²¹ Laha tonga ny andro nifanapahana, die nitoboka tambon’ny sezan’ny fanjakany i Herôda mpanjaka sady nagnano ny akonjon’ny mpanjaka, ka nikabary tamin’ny fokon’olo. ²² Ny fokon’olo marobe nijaka hoe: Ha! Feon-Jagnahary izany fa tsy feon’olombelogna. ²³ Tsy fotony tsy lagny teo, die nisy anjelin-Jagnahary namely an’azy satria izy tsy mba magnome voninahitra an’ny Zagnahary, ka die maty nohanin’ny viky arỳ. ²⁴ Ka niely sady nandroso ny hafatrin’Agnahary. ²⁵ Laha vita ny fanompôna nataon’i Barnabasy izy amin’i Saoly tagny Jerosalema, die nipody areo, ka nindandreo nagnarakan’azy i Jaona na i Marka.

TOKO 13   ↑

Nalefa ho misionera i Barnabasy izy amin’i Saoly

¹ Tamin’ny fengonana tagny Antioka, die nisy mpaminagny mbana mpampianatra: Die i Barnabasy izy amin’i Simeona, na angihana koa hoe: Nigera, izy amin’i Losio Kyreniana die i Menahema mandy koa (nanagna lonilony tamin’i Herôda mpandidy) izy amin’i Saoly. ² Raha nagnano fanompô-pivavahana ho an’ny Zagnahary areo sady nifady hanina, die nagnano ny Fagnahy Masina hoe: Akokàny ho an’Aha i Saoly izy amin’i Barnabasy, hagnano ny asa nampagnamboarik an’azy. ³ Ka laha avy nivavaka areo sady avy nifady hanina, die nametrahany tagnana, ka nalefany nadeha areo rôlahy.

Any Sipra i Barnabasy sy i Saoly

⁴ Die nirahin’ny Fagnahy Masina izy rôlahy hidigna agny Seleokia, hivarigna an-dakagna^* ho agny Kyprosy. ⁵ Laha tonga tagny Samalia areo, die nitory ny hafatry Zagnahary tam-pengonanan’ny Jiosy; ka nindan-dreo mandy i Jaona mba hagnampy andreo. ⁶ Laha nitety farihy areo, die tonga tagny Pafô, die nahita Jiosy raike ombiasy^* be sady mpisandoka ho mpaminagny; i Barjesosy ny agnarany. ⁷ Izy die mitoboka amin’i Sergiô Paôlô, leben’ny governora sady olo-kendry io zalahy io. Nagniry haregny ny hafatrin’Agnahary izy, ka nampagnafatra an’i Saoly izy amin’i Barnabasy ho amin’azy agny. ⁸ Nitoerin’i Elyma ombiasa^* be io areo rôlahy (izay mako ny agnarany raha adìka) sady nisakanany i Sergio mba tsy hino an-dreo. ⁹ Fa i Saoly na i Paoly, feno Fagnahy Masina, ka nipesoka an’azy feizay, ¹⁰ nagnano hoe: Anao izany ka tsy egnina hagnolakolaka ny lala-mahitsy namboarin-Jagnahary an? Anao olo mpamitafitaka, mpametsifetsy sady fahavalon’ny marina, zanaka devoly^*. ¹¹ Niany die niany mandy anao die ho jamba tsy ahita masoandro, fa Zagnahary hamely anao. Tonga die avy tamin’azy ny fahajambana, ka niraparapa niaragn’olo hitantagna. ¹² Ka la nahita an’izany ny governora, die zendagna sady nino ny fampenaran’ny Tompo.

Ny fanambaràna nataon’i Paoly tagny Antioka agny Pisidia

¹³ Die nivarigna tan-dakagna^* i Paoly niaraka tamin’ekemany, niala an’i Pafo, die tonga tagny Perga agny Pamfylia; fa i Jaona nipody ho agny Jerosalema. Ka laha nialan’i Perga areo, die tonga tagny Antioka agny Pisidia, die niditra tamin’ny synagoga^* tamin’ny andro Sabata^*, ka nitoboka teo. ¹⁵ Laha avy namaky ny bokin’ny lalàgna mban’ny bokin’ny mpaminagny, die nijaka tamin-dreo ny leben’ny synagoga^* hoe: Sô die misy fagnanarana ataonareo amin’olo azafady. ¹⁶ Nagnopakopa-tagnana i Paoly nagnano hoe: Anareo manafo lahin’ny Isiraely, anareo izegny mataotra an’Agnahary, tenoy tsara ity: ¹⁷ Ny Zagnaharin’ny Isiraely, efa nifidy ny razantsena, sady nanangagna olo tamin-dreo tamin’ny mbola nitoboka tagny Egipta, ka ny sandriny no nitondrany an’azy nivôka tao. ¹⁸ Ka nandeferany areo tamin’ny raha namboarin-dreo tan-tany fôgna tagny nandritry ny efa-polo taogna. ¹⁹ Laha avy nandrava firenena fito tagny Kanàna Izy, die nampandovainy andreo izany, ²⁰ nandritry ny dimapolo amby efa-jato taogna ka laha afaka izany, die nomeny mpitsara areo nanomboka tamin’i Samoela mpaminagny. ²¹ Aviteo n’igny laha, nangataka mpanjaka areo; ka namen-Jagnahary an’i Saoly efa-polo taogna, die i Saoly zanaka’i Kisy, lelahy avy amin’ny firenenan’i Benjamina. ²² Laha nangala an’i Saoly Izy, die nametraka an’i Davida ho mpanjakan-dreo sady nagnano hoe: «Hitako i Davida, zanak’i Jese fa lelahy eken’ny foko, sady hagnano ny sitrapoko manontolo.» (1 Sam. 13:14; Sal. 89:20). ²³ Avy tamin’ny taranak’io lelahy io no namoahan’Agnahary an’i Jesosy, efa nampagnantegnainy hagnavotra an’i Isiraely. ²⁴ Talohan’ny natongavany anefa, die nitory ny batisan’ny fibebahana tamin’ny olo’ny Isiraely alohake i Jaona. ²⁵ Ka laha efa hifaragna ny dian’i Jaona, die nijaka izy hoe: Iza ny feveranareo an’aha? Tsy Izy aho; fa avy afarako Izy, na die izaho aza tsy magneva hamaha tadikiraro aby. ²⁶ Ho anareo taranak’i Abrahama, mban’izegny mataotra an-Jagnahary egny aminareo egny, antsena no nampitondrana ny hafatra ho fagnavotana izao. ²⁷ Satria areo mitoboka agny Jerosalema mban’ny lebeny tsy nahalala an’Azy, na die ny feon’ny mpaminagny nivakina tamin-dreo isaky ny iSabata^* io, die nahatanteraka an’izany tamin’ny nagnameloany an’Azy. ²⁸ Ka na die tsy hita aza ny raha tokony hagnameloana an’Azy ho faty, die nangataka tamin’i Pilato mandy areo mba hamono an’Azy. ²⁹ Ka vita-dreo aby ny raha vôsoratra momba an’i Jesosy, vô nalainy tambony kakazo teo Izy, ka nalevigny tam-pasagna. ³⁰ Fa Zagnahary, nanangagna an’Azy tamin’ny maty. ³¹ Matetik’Izy die miseho amin’olo mpagnaraka an’Azy avy agny Galilia ho agny Jerosalema, ka areo no vavolombelogna amin’olo. ³² Ka ahay mba mitory aminareo ny filazantsara nampagnantegnaina ny razagna. ³³ Die nitanterain-Jagnhary tamin’ny razantsena izany, raha nanangagna an’i Jesosy Izy, araka ny vôsoratra amin’ny Salamo faroy hoe: «Iaho no niteraka Anao, ka Zanako Anao» (Sal. 2:7). ³⁴ Sady efa nijakainy fa natsangany tamin’ny maty Izy, ka tsy mety lò koa, tamin’ny Izy nagnano hoe: «Ameko anareo ny tegna fandeferana nampagnantegnaina an’i Davida» (Isa. 55:3). ³⁵ Die hoy mandy koa Izy amin’ny Salamo hafa hoe: «Tsevelanao ho lò zany mihintsy Olo Masinanao» (Sal. 16:10). ³⁶ Laha navita ny sitrapon-Jagnahary sady avy nagnano soa tamin’ny mpiara-monigna tamin’azy i Davida, die maty , ka nakambagna tamin’ny razany izy, sady nety lò; ³⁷ f’izegny natsangan-Jagnahary ho velogna, tsy mba mety lò. ³⁸ Die fantaro tsara mandy koa azalahy, fa Izy no itoriana ny famelan-keloka ho anareo; ³⁹ ka amin’Azy no agnamarinana an’izegny mino ho afaka amin’ny fahotana tsy hazaoanareo marina tamin’ny lalàgnan’i Mosesy. ⁴⁰ Ka tendremo tsara sô die ho tonga aminareo ny raha nijakain’ny mpaminagny hoe: ⁴¹ «Anareo mpamotsifotsy, die gagà, ka milevògna; fa hisy raha amboariko amin’ny andronareo; die raha tsy mba hinônareo aby na die hozakaina aminareo aza» (Hab. 1:5). ⁴² Ka laha nivôka izy, die nangatahin-dreo mba hijakaina amin-dreo ao ndraika mandeha mandy koa izay amin’ny Sabata^* magnaraka. ⁴³ Laha niravagna ny fivorena, die maro tamin’Jiosy^* mban’ny proselyta^* efa nivavaka no nagnaraka an’i Paoly izy amin’i Barnabasy, ka nijaka areo rôlahy sady nandrisika an-dreo mba haharitra amin’ny fahasoavan’Agnahary.

Mitodika amin’ny Jentilisa^* ry Paoly sy i Barnabasy

⁴⁴ Tamin’ny Sabata^* magnaraka an’igny, die tafavory aby ny tanan-draike hiteno ny hafatry ny Zagnahary. ⁴⁵ Ka la nahita ny fokon’olo nitangorogna tamin-dreo ny Jiosy^*, die niseragna ny felognany ka nitoeriny aby ny raha nijakain’i Paoly sady nompainy arỳ. ⁴⁶ Ka hozy i Paoly izy amin’ny Barnabasy nasahy nijaka nagnano hoe: Tsy mentsy nitorina taminareo alohake, ny hafatry Zagnahary; ka la nandà anareo, fa hoe tsy magneva ny hahazo ny fiaignana mandrakizay, die nitodika tagny amin’olo-tsotra ahay. ⁴⁷ Efa nandidy anay ny Tompo hoe: «Efa nitendreko hagnazava ny olo Jentilisa^* anao. Mba hagnavotra an-dreo hatragny amin’ny faravazantany» (Isa. 49:6). ⁴⁸ Laha naregny an’izany ny olo-tsotra, die faly ka nankalaza ny hafatry ny Zagnahary; ka izegny efa vôlahatra ho agny amin’ny fiaignana mandrakizay die nino aby. ⁴⁹ Ka niely nagneran-tany ny hafatry Zagnahary. ⁵⁰ Die nitaritin’ny Jiosy^* aby ny viavy mpivavaka sady manankatao tan-tanàna tao miaraka amin’ny zokizokiolo, ka nanambotra an’i Paoly izy amin’i Barnabasy sady nandrôka an-dreo henga tao. ⁵¹ Nahintsagn’izy rôlahy ny fotaka tamin’ny tongony mba hempangan-dreo die lasa areo nandeha agny Ikonioma. ⁵² Ka die feno Fagnahy Masina ny mpainatra sady faly.

TOKO 14   ↑

Tagny Ikonioma i Paoly sy i Barnabasy

¹ Laha tonga tagny Ikonioma i Paoly izy amin’ny Barnabasy, die niaraka nitsofoka tamin’ny Synagogan’ny^* Jiosy^*, ka nitory ny hafatra, ka enjagna ny olo nino tao, na Jiosy^* izany, na olo tsy mbola nivavaka aza. ² Fa ny Jiosy^* izegny tsy nety nino, die nitarika sady nagnatoro loha ratsy an’ny olo Jentilisa^* sasagny mba hanohitra ny akamany. ³ Na die zany aza, die mbola nitoboka ela teo areo sady nasahy nitory satria natoky an’ny Tompo, nagnome an-dreo vavolombelogna hagnamarina ny hafatry ny fasoavany, nahafahandreo nagnano famantarana amam-pagagana. ⁴ Niraika fiena ny fokonolo tan-tanàna, ny sasagny nagnaraka an’i Jiosy^*, ny sasagny nagnaraka ny Apôstôly. ⁵ Efa nagnano tetika hangala baràka andreo izy, sady nitily vato areo mban’ny Jiosy^* mban’ny lebeny. ⁶ Kanefa fantany izany, die lasa nilefa niorika nenga Lystra, mban’ny Derbe, an-tanànan’ny Lykaonia magnodigna areo. ⁷ Die nitory ny filanzantsara tagny.

Fagnasitragna zalahy malemy raike tagny Lystra

⁸ Nisy zalahy raike nalemy hongotre atakibondrenine, tsy mahay mandeha, tagny Lystra; ⁹ naregny an’i Paoly nitory ny hafatra izy die nino. Ka i Paoly mandy koa nahita fa magneva ho sitragnina izy, ¹⁰ die nangaika marehy izy nagnano hoe: Mitsangàna amin’ny hongotrao anao. Die nitsambikimbikigna na lelahy igny ka nahay nitsangagna. ¹¹ Laha nahita an’izany ny fokonolo maro be teo, die nagnenga feo marehy nijaka tamin’ny fizakàna Lykaonia hoe: Tegna Zagnahary mangala tarehin’olo mihintsy ito! ¹² Ka ny agnaran’i Barnabasy novan-dreo an’i Jopitera, negnaran’i Paoly nataony an’i Merkory satria izy no mpandaha-teny. ¹³ Ka ny mpisorognan’i Jopitera tagnivon-tanàna, niaraka tamin’ny fokon’olo, nitondra ombilahy miaraka amina vonikazo natao engombavahady, ka nagniry agnano sorogna areo. ¹⁴ Ka laha regnin’ny Apôstôly, die i Paoly izy amin’i Barnabasy nandrota ny raha nitafiany ka tonga die nitsatoka tagnivon-dreo teo areo nijaka hoe: ¹⁵ Azafady aminareo azalahe! Nagnino anareo magnano raha ôtran’io? Ahay die olombelogna ôtranareo mandy, magnambara ny filazantsara aminareo, mba enganareo amin’ny raha tsisy lagniny, hagnantognanareo an’i Zagnahary velogna, hagnano ny tany aman-dagnitra, mban’ny ranomasina miaraka amin’ny raha marobe agnatiny. ¹⁶ Izy tsy mba nanakagna ny firenena marobe taloha tagny amin’ny lalagna tieny ombàna. ¹⁷ Kanefa tsy navelany tsy nisy vavolombelogna ho an’Azy amin’ny raha tsara nataony, nalatsagny ho anareo ny herika, havokatra ny tany hahavoky anareo, anagnanareo hafalena. ¹⁸ Ka na die nagnazava an’izany areo, die seky tsy nahasakagna ny olo tsy hamono raha atolotra andreo. ¹⁹ Tamin’izay die nisy Jiosy^* avy tamin’Antioko, tan’Ikonioma, nitarika ny fokon’olo hitily vato an’i Paoly die nitaritaritin-dreo tam-belagny tanàna , satria nieritreretin-dreo olo efa maty arỳ. ²⁰ Die nodidignin’ny mpianatra izy, die nitsangana ka niakatra tan-tanàna. Amaraignan’igny mandy izy amin’i Barnabasy die nandeha tagny Derbe.

Ny fiverenana tagny Antioka agny Pisidia

²¹ Ka laha avy nitory ny filazantsara tamin’io tanàna io areo die nahazo mpianatra enjagna, die nipody tagny Lystra mbany tagny Ikonioma, mbany t’Antiokia ndreka areo, ²² nagnanagnanatra ny mpianatre sady nampahery andreo mba hanagnany faretana amin’ny finôna, sady nampilaza fa tsy mentsy fijalena no eretantsena vô miditra agny amin’ny fanjakan’Agnahary. ²³ Laha avy nanendry mpitondra fengonana izy, die nivavaka sady nifady hanina ka nanolotra an’azy ho an’ny Tompo ninôny. ²⁴ La avy namakivaky an’i Pisidia areo, die tonga tagny Pamfylia. ²⁵ Die nitory ny hafatre tagny Perga koa areo, die nidigna tagny Atalia. ²⁶ Aviteon’igny areo, die nivarigna tan-dakagna^* ho agny Antiokia, tamin’ny nanolorana an’azy ho amin’ny asa nagnirahana an’azy. ²⁷ Ka la avy tao areo, die namory ny fengonana, ka nitantantara ny haleben’ny raha namboarin-Jagnahary tamin’azy, mban’ny namoahany ny varangaram-pinôna ho an’ny olo Jentilisa^*. ²⁸ Die nitoboka ela ela tamin’ny mpianatra tao izy.

TOKO 15   ↑

Tsy fitovian-kevitra momba ny famorana

¹ Nisy olo sasagny avy tagny Jodia^* nampianatra ny olo raike finôna hoe: Raha tsy foràna ôtran’ny fataon’i Mosesy anareo, die tsy nôvonjy. ² Laha avy nifanditra sady niady hevitra tamin-dreo i Paoly izy amin’i Barnabasy, die nifagnaraka fa ho hiakatra ho agny Jerosalema areo rôlahy miaraka amin’ny sasasasagny tamin-dreo handinika an’izany amin’ny Apôstôly mban’ny mitondra fengonana. ³ Die nateterin’ny fengonana areo, ka nanohy ny diany namakivaky an’i Foinika mban’ny Samaria, ka nitantara ny niovan’ny olo Jentilisa^* fo, ka nahafaly ny havana raike finôna tamin-dreo izany. ⁴ Ka la tonga tagny Jerosalema areo die niraisin’ny fengonana mban’ny Apôstôly, ka nitantara ny haleben’ny raha namboarin-Jagnahary tamin’azy. ⁵ Ny mpino sasagny, antokon’ny Fariseo^* io nitsangagna sady nijaka hoe: Tsy mentsy foràna areo, ka didina mba hagnaraka ny lalagnan’i Mosesy.

Ny adihevitra tagny Jerosalema

⁶ Die nivory ny Apôstôly mban’ny mpitondra fengonana, mba handinika an’izany. ⁷ Ka la mbola nisy ady hevitra be mandy, tao die nitsangagna i Petera nagnano hoe: E! Zalahe, anareo die mahafantatra fa efa ela no nifidin-Jagnahary taminareo fa avy amin’ny vavako no andregnesan’ny Jentilisa^* ny feon’ny filazantsara mba hinôny an’azy. ⁸ Ka Zagnahary mahafatatra ny fon’olo, die vavolombelogna tamin’ny magnomezana ny Fagnahy Masina ôtrany tamintsena mandy koa; ⁹ fa tsisy hafa antsena io, fa efa nidioviny tamin’ny finôna ny fony. ¹⁰ Ka nagnino anareo raha magnala fagnahy an’Agnahary, ka magnisy jioga amin’ny vozogny mpianatra, nefa asena tsisy naleo an’izany na die ny razantsena aza? ¹¹ Fa ny fasoavan’i Jesosy Tompontsena mandy no ninôntsena, ka nazaôntsena fagnavotana, die ôtran’izany mandy koa areo io. ¹² Die nagnigna aby ny olo tao niteno an’i Paoly izy amin’i Barnabasy nitantara ny famantarana amam-pagagàna enjagna nampagnanôvin-Jagnahary andreo tamin’ny olo Jentilisa^*. ¹³ Laha tapitra ny vorian’izy rôlahy, die namaly i Jakôba nagnano hoe: E! Zalahe, mba tenoinareo ma aho e! I Simeona de efa nijaka ny nitsinjovan’Agnahary ny Jentilisa^* tamin’ny vôlongany die hangala ny olo amin’azy mba hagajàna ny agnarany. ¹⁵ Ka mifagnaraka amin’ny raha nijakain’ny mpaminagny hoe: ¹⁶ «Laha vita izany, die hipody Aho, ka atsangako indraika mandeha ny tragnon’i Davida efa tola; ka hatsangako izegny efa rava ao. Ka amboariko ndreka. ¹⁷ Mba hiaragna ny Tompony olo sisa ao, mban’ny olo Jentilisa^*, efa nangaika ny Agnarako, hozy ny TOMPO^*. ¹⁸ Izay nagnano ny raha efa fantatra hatagny ambôlongany.» (Amo 9:11-212) ¹⁹ Ny hevitra an’aha die izao: Tsy mety raha asena no hagnome fasairagnana^XVI ho an’olo Jentilisa^*, hipody amin-Jagnahary; ²⁰ fa andao asena hanoratra taratasy amin-dreo mba hifadianany hena vetaveta amin’ny sampy, ny fafy fady,^XVII mban’ny biby kendaina sady hifadianay rà. ²¹ Fa hatragny amin’ny razantsena taloha die nagnano an’izany mandy koa; managna mpitory isan-tanàna i Mosesy satria vakina isan-dapabe, isan-synagoga^* izany isakin’ny Sabata^*.

Fanapahan-kevitra sy taratasy iombonana

²² Die neken’ny Apôstôly mban’ny mpitondra fengonana manontolo izany, ka nifidy sasasasagny tamin-dreo areo mba hirainy hiaraka amin’i Paoly izy amin’i Barnabasy ho agny Antioka, die i Joda na angihana mandy koa hoe: Barnabasy, die i Silasy; areo samy tsara laza aby. ²³ Nampitondra taratasy areo alefa agny, ôtran’izao ny vakiny: “Ahay Apôstôly mban’ny mpitondra fengonana miaraka amin’ny havana atỳ die magnotsafa anareo havanay agny amin’olo Jentilisa^* agny Antioka, Syria, Kilikia. ²⁴ Efa regninay fa nekamanay sasagny, nagnano raha nampiologna anareo tatỳ, ka nampikarasoka ny lohanareo, kanefa efa nandrara an’azy ahay. ²⁵ Die nivory ahay marobe, ka nanapakevitra ny handefa olo ho atỳ aminareo hiaraka amin’i Paoly izy amin’i Barnabasy. ²⁶ Manafo lahy, efa nagnano ny aignany tsisy dikany mba ho voninahitry ny agnaran’i Jesosy Kristy Tompontsena. ²⁷ Die nagniraka an’i Joda izy amin’i Silasy ahay, mbola hizaka an’izany aminareo mandy koa. ²⁸ Amin’ny fonay sady eken’ny Fagnahin Masina ny tsy ampitondra entagna mavesatra anareo, afa tsy ny raha tsy mentsy ho tandremanareo itỳ mandy. ²⁹ Die ny hifadiananareo ny hena aterina amina sarivongagna, mbana fafim-pady, mbana biby kendaina, mbana rà; tegna tsara raha vôfadinareo aby izany. Hono ka ho tsara aby anareo agny.” ³⁰ Die nalefany areo, ka lasa nandeha agny Antioka; ka namory olo maro, sady natolony ny taratasy. ³¹ Ka laha avy namaky an’izany areo die ravo, naregny ny anatra tsara tagnatiny. ³² I Joda izy amin’i Silasy lateo mpaminagny, die nagnararaotra nagnanatra sady nampahery andreo. ³³ Laha avy nitoboka elaela tao areo, die napodin-dreo sôman-tsara ho agny amin’ny olo nagniraka an’azy. ³⁴ I Joda mandy no nadeha nipody, fa i Silasy mbola nijanogna tao. ³⁵ I Paoly izy amin’i Barnabasy, nitoboka tagny Antioka; ka nampianatra sady nitory ny hafatry ny Tompo areo rôlahy niaraka tamin’ekamany. ³⁶ Laha afaka andro vitsivitsy, die nijaka i Paoly tamin’i Barnabasy hoe: Andao asena hipody amin’ny tanàna efa nitoriantsena ny hafatry ny Tompo, mba hijerevantsena ny fiovàny. ³⁷ Nagniry hintondra an’i Jaona, angihana hoe: Marka i Barnabasy mba hiaraka amin-dreo ho agny. ³⁸ Fa tsy nagneky hitondran’io i Paoly satria efa nilefa an-dreo tagny Pamfylia ka tsy niara-niasa tamin-dreo. ³⁹ Nifanditra teo areo rôlahy ka ny afaràny die nisara-dia; i Barnabasy nitondra an’i Marka, ka nivarigna tan-dakagna^* ho agny Kyprosy. ⁴⁰ Fa i Paoly nifidy an’i Silasy, die lasa, raha neken’ekamany ho amin’ny fahasoavan’ny Tompo izy. ⁴¹ Die namakivaky an’i Syria, Kilikia areo, nampahery ny fengonana tagny.

TOKO 16   ↑

Niara-niasa tamin’i Timoty i Paoly sy i Silasy

¹ Die tonga tagny Derbe mban’ny Lystra mandy koa areo, ka nisy mpianatra raike atao hoe: Timoty ny agnarany, zanaky raviavy Jiosy mpino izy, fa Grika ny abany. ² Izy mba tsara laza tamin’ny olo raika finôna tagny Lystra izy amin’i Ikonionia. ³ Tien’i Paoly hindao niaraka amin’dreo izy; satria Jiosy tamin’io tany io die noforàny izy, satria fanta-dreo fa Grika ny abany. ⁴ Ka raha nandeha nitety tanàna tagny areo die nampitandreminy ny olo tao ny didy namen’ny Apôstôly mban’ny mpitondra fengonana tagny Jerosalema. ⁵ Ka nemaro isan’andro ny fengonana sady nitombo finôna.

Ny antson’ilay Makedoniana

⁶ Laha niraràn’ny Fagnahy Masina tsy hitory ny hafatra agny Asia areo, die nandeha namakivaky an’i Frygia mban’i Galatia. ⁷ Ka tonga tamorogn’i Mysia, die mbola seka ho agny Bitynia areo, fa tsy neken’ny Fagnahin’i Jesosy. ⁸ Ka la nandalo an’i Mysia areo, die nidigna tagny Troasy. ⁹ Ndreka aligna ny andro die nisy sindrimandry niseho tamin’i Paoly; nisy zalahy Makedoniana nitsangagna teo ka nangataka an’azy hoe: Mitsakàha atỳ Makedonia, ka avoty ahay! ¹⁰ Eo ny eon’igny izy ndreka, avy nahitan’ny sindrimandry igny die seka nandeha ho agny Makedonia ahay, neveriny fa Zagnahary nagniraka anay hitory filazantsara amin’olo agny.

Ny nanaovana batisa an’i Lidia tagny Filipia

¹¹ Ka laha nivarigna tandakagna^* nialan’i Troasy ahay, die nandeha nahazo an’Samotrakia; ka amaran’igny vô nadeha tagny Neapolia. ¹² Laha nenga teo ahay die nandeha tagny Filipy, tanàna vôlongany amin’ny fartanin’i Makedonia sady zana-taniny. Andro vitsivitsy ahay nitoboka tamin’io tanàna io. ¹³ Nivôka tambelagny vavahady ahay tamin’ny Sabata^* ka nagnantogna tamoron’ny farihy teo, fa neverinay fa eo ny toeram-pivavahana, ka nitoboka teo ahay, sady nivoria tamin’ny zavavy maro tafangogna teo. ¹⁴ Nisy zavavy raike, i Lydia negnarany, mpivarotra lamba voloparasy, avy an-tanànan’i Tyatira, mpivavaka amin-Jagnahary, die niteno tsara izy, ka nivoahin’ny Tompo ny fony hitandrina ny hafatra nijakain’i Paoly. ¹⁵ Laha avy natao batisa izy, niaraka amin’ny vady aman-janagny, die nangataka izy nagnano hoe raha mba ho mpiasan’ny Tompo mandy aho, die nidira an-dragnoko ka mitoboka ao. Sady nifôrseny ahay.

Nampidirina an tragnomezigna i Paoly sy i Silasy nefa nafahana

¹⁶ Laha nandeha hivavaka ahay, die nifanepaka tamina viavy mpiasan’olo raika izay, nisindrem-pagnahy haminagny izy io, ka ny faminaneny no nazaôn’ny olo mampiasan’azy heregna be. ¹⁷ Nagnapoko izy nagnaraka anay amin’i Paoly sady nijaka hoe: Ito manafo lahy ito die tegna mpanompon’Agnahary antam-pon’ny loha, magnatoro anareo ny lalam-pagnavotana. ¹⁸ Natetitetika izy nagnano an’izany, farany ka vignitra i Paoly sady nitodika tamin’azy nagnano hoe: Amin’ny agnaran’i Jesosy Kristy no andidiako anao, mivoaha tagnatiny tao anao. ¹⁹ Laha hitan’olo nampiasan’azy fa ho tapaka ny kapôkany amin’ny fazaôny haregna be, die nisamboriny i Paoly izy amin’i Silasy ka nindany nitety tsena agny amin’ny lebe. ²⁰ Laha tonga tagny amin’ny mpitondra fanjakana areo rôlahy, ka nataony hoe: Ito manafo Jiosy rôlahy ito magnakorontagna ny tananàntsena eto. ²¹ Mampianatra raha tsy azontsena atao sady fady antsena amin’ny maha Romanina antsena. ²² Tafatsangagna aby ny fokon’olo marobe hamango andreo; ka nampangalain’ny mpitondra fanjakana aloha ny akanjony vô nalefany nivangona tamin’ny kaboda areo. ²³ Laha avy nilamolamoin-dreo marehy areo die nampidiriny tampigadràna, sady nampembeniny tsara. ²⁴ Laha avy nahazo beko ny mpiambigna die nampidiriny amin’ny tegna agnatiny be agny, sady nibolokiny tamina boloky kakazo ny tongony. ²⁵ Tokotokony tamin’ny sasan-kaligna, die nivavaka sady nagnano hira fideranan’Agnahary i Paoly izy amin’i Silasy, ka niteno andreo aby ny gadra tao. ²⁶ Tampoka teo, die nisy horohoro tany mafy be izay, nagnozokozogna ny tragno hatram-potony, ka nivoha ho azy aby ny varangaragna marobe, sady nivoha hatramin’ny fototrandreo maro be. ²⁷ Nasiaro tegna ny mpiambigna, ka taitra izy laha nahita ny varangaragna nivoha, die nitsoahiny ny antsiny^xviii ka seka hamono tegna izy, satria neveriny fa nilefa tao aby ny gadra. ²⁸ Fa nangaika marehy i Paoly hoe: Aza mamono tegna, fa ato mandy ahay maro be. ²⁹ Die nangataka jiro izy, sady niditra malaky ka nangitakitaka nandoalika tangongitr’i Paoly izy amin’i Silasy. ³⁰ Die nindany nivôka areo rôlahy, ka nagnontany izy hoe: Ino ataoko, azafady,^xix mba ho vôvonjy aho? ³¹ Die hoy areo rôlahy an!: Minoa an’i Jesosy Tompo die hovonjena by anareo mianakaby. ³² Die nitorian’izy rôlahy ny hafatry ny Tompo aby na izy na izegny olo tandragnony tao. ³³ Alignan’igny mandy, die nindany areo rôlahy ka nisasany ny bainy; ka tamin’ny andron’io mandy koa no nagnanôvana batisa an’azy mianakaby mban’izegny olo tao. ³⁴ Die nindany niakatra tan-dragnony areo rôlahy, ka nirosonan-dreo hanina, sady niaraka nifady areo mianakaby, satria nino an’i Zagnahary. ³⁵ Amaraignan’igny, die nagniraka ny mpitagna lefogna ny mpitondra fanjakana hoe: Alefaso agny manafo io. ³⁶ Die nijaka tamin’i Paoly ny mpiambigna hoe: Nagniraka anay andefa anareo ny lebe^xx hoe: Mivoaha anareo ka mandihana soamantsara. ³⁷ Die mamaly i Paoly hoe: Ahay die Romanina, nefa sady efa nilamolamoiny ahay sady nitsaraina tamansom-pokon’olo, aveo die nigadraina ndreka, die ho azony atao ny handefanay an-tsokosoko va? Tsy azony atao izany, fa avilay izy tegnany andeha aminay atỳ hamôka anay tato. ³⁸ Die lasa ny mpitagna lefogna nitantara an’izany tagny, ka nangoaigna izy la naregny fa Romanina areo rôlahy. ³⁹ Die avy tao tegnany izy, ka nivalo tamin-dreo, sady nitondrandreo nivôka ka nengavy tamin-dreo mba hiala tan-tanàna teo. ⁴⁰ Die niala tao areo ka nivantagna tan-dragnon’i Lydia; ka laha nahita ny havana raika finôna tamin-dreo areo die nagnanagnanatra andreo ka lasa nandeha.

TOKO 17   ↑

Tagny Tesalônika i Paoly amin’i Silasy

¹ Die namakivaky an’i Amfipolia sy Apolonia areo, die tonga tagny Tesalônika, ka nisy sinagogan’i^* Jiosy tao. ² Niditra tao i Paoly ôtran’ny fataony, ka Sabata^* telo no nedeny hevitra tamin’olo tao makasika ny Soratra Masina. ³ Naseony sady niporofoiny mazava fa tsy mentsy nijaly sady nitsangagna tamin’ny maty i Kristy^*, ka i Jesosy, toriko amindreo io, hoy izy, no tena Kristy^*. ⁴ Nino ny sasagny tamin-dreo, ka nikambagna tamin’i Paoly izy amin’i Silasy, ôtran’izany mandy koa ny olo Grika marobe niova fo, mban’ny viavy nanan-kaja. ⁵ Velom-pelognana ny Jiosy, ka nagnangogna olo ratsy fagnahy tamin’ny tsena tagny, ka laha navôangogna maro areo, die nagnakoron-tagna ny tanàna, nagnodidigna ny tragnon’i Jasona, sady te hamôka andreo rôlahy hamason’olo. ⁶ Laha tsy nahita andreo rôlahy areo, die i Jasona mban’ny havana raika finôna tamin’azy sasagny nitaritiny ho angy amin’ny leben’ny tanàna hagnano kokambo hoe: Tonga atỳ koa manafo mpagnakorontagn’olo io e! ⁷ Ka nampandrosoin’i Jasona areo, nefa areo maro be nanohitra ny raha nijakain’i Kaisara, satria nijaka areo, fa misy mpanjaka hafa koa agny, die i Jesosy. ⁸ Die taitra ny fokon’olo miaraka amin’i ben’ny tanàna, naregny an’izany. ⁹ Ka tsy navelany nandeha i Jasona mban’ny akamany raha tsy mametraka antoka.

Paoly agny Beria

Alignan’igny, die nampandihan’ny mpiara mivavaka amin-dreo ho agny Beria i Paoly izy amin’i Silasy; ka laha avy tagny areo, die niditra tamin’ny synagogan’ny^* Jiosy^* tao. ¹¹ Tsara fagnahy areo tao; toy izay tagny Tesalônika; satria sady nazoto nandray areo sady nazoto nandinitra ny Soratra Masina isan’andro, na na marina izany na tsy marina. ¹² Maro tamin-dreo no nino, tsy vitsy tamin’dreo ny viavy tsy mpivavaka nanan-kaja mban’ny lelahy. ¹³ Laha regnin’ny Jiosy tagny Tesalônika fa nitory ny hafatry Zagnahary tagny Beria i Paoly, die nandianany tagny ka niliveliveziny sady nokorontagniny ny fokon’olo. ¹⁴ Ka nampilefasin’ny akamany nandeha hatragny amoron-dranomasina i Paoly, fa i Silasy izy amin’i Timoty koja mbola nibela tao.

I Paoly tagny Antena

¹⁵ Nagnaraka an’i Paoly hatra-Antena areo izegny nagnatitra an’azy; ka nafarany i Silasy izy amin’i Timoty mba ho amin’azy agny, die lasa areo. ¹⁶ Ka la nandigny andreo tagny Antena i Paoly, die taitra ra nahita ny tanàna feno sampy. ¹⁷ Ka isan’andro izy die miady hevitra amin’ny Jiosy^* mban’ny proselyta^*, tamin’ny synagoga^*, mban’ny olo tafangona mamonjy tsena. ¹⁸ Ndre ny olo-manampahy sasagny tamin’ny Epikoreana mban’ny Stoika, nanohitra an’azy aby. Ka ny sasagny die nijaka hoe: Ino ra tien’ny zalahy mibedibedy ity zakaina? Die namaly ny sasagny hoe: Mitory Zagnahary vaovao, izany hoe e! Jesosy mban’ny fitsanganan’ny maty izany ra toriny io. ¹⁹ Die nalain-dreo izy, ka nindaony agny Areopago, sady nagnontaneny hoe: Ka mba azonay fantariny ma izany fampenarana vaovao zakainao izany an? ²⁰ Hafahafa, sady mbola tsy faregnin’ny tadigninay mako izy izany; ka mba tienay ho lala ny dikany. ²¹ (Fa ny Ateniana marobe mban’ny vahiny mitoboka teo, tsy mba mieritreritra raha hafa, afa-tsy hifosa olo.)

Lahatenin’i Paoly teo amin’ny Areopago

²² Die nitsangagna tagnivodreo teo i Paoly, sady nagnano hoe: Anareo lelahin’ny Anteniana, amin’ny raha marobe, die hitako fa tegna mivavaka amin’ny zagnaharinareo anareo. ²³ Raha nandeha aho, ka nandinika ny raha hivavahanareo, die nahita alitara raike misy sorotra hoe: HO AN’IZAY ZAGNAHARY TSY FANTATRA. Ka amin’izay ivavahanareo, tsy fantatrareo izany no toriko aminareo. ²⁴ Die Zagnahary, nagnano ny raha aby izao mban’ny raha maro be amin’azy ito, Izy no Tompon’ny tany aman-dagnitra, ka tsy mitoboka agnatina tempoly^* natoan-tagnana, ²⁵ sady tsy mba tompoin’ny tagnan’olombelogna ôtran’ny mila tambiny, fa Izy no magnome aigna mbana fofogn’aigna ny raha maro be. ²⁶ Avy tamin’olon-draike no neven’ny firenena maro be, mba ho feno olo ny vohon-tany maro be, sady Izy mandy no mametra ny androny mban’ny faritany hitobohany, ²⁷ mba heragnany an’ny Zagnahary , raha miaragna an’Azy izy die ahita sady tsy mba lavitra antsena Izy. ²⁸ Avy amin’Azy no ivelomantsena, ihetsehantsena, iaignantsena; araka nizankain’ny mpihira sasagny aminareo hoe: Taranagny asena. ²⁹ Ka satria asena die taranaka Zagnahary, die tsy tokony hampitovitovy fahatany ny fomban-Jagnahary amina volamena mbana voalfotsy, mbana vatosoa namboarin-tagnan’olo amin’ny fara-fahaizany. ³⁰ Komay tsy nizahan-Jagnahary ny andron’ny tsy fahafantarantsena; fa amin’izao koja Izy die mandidy ny olombelogna manontolo mba hivalo amin’izay. ³¹ Satria Izy efa nanokagna andro raike, hitsarany an’izao tontolo izao amin’ny rariny, amin’ny alan’ny Zalahy raike izay efa Vôtendriny, mba hinôn’ny olo maro, tamin’ny nananganany an’Azy tamin’ny maty. ³² Niomehy ny sasagny laha naregny ny amin’ny fitsanganan’ny maty, fa ny sasagny koja nagnano hoe: Ahay ka mba hiteno anao mandy ka. ³³ Die nenga teo i Paoly. ³⁴ Ka nisy olo sasagny nino ka niaraka tamin’azy, anisan’izany i Dionysio Areopagita miaraka amin’ny zavavy raike angiana hoe Damary mban’ny akamany.

TOKO 18   ↑

Ny niorenan’ny Fengonana tagny Korinto

¹ Tafaran’io die niala tagny Atena i Paoly, ka nandeha agny Korinto. ² Tao no nahitany ny Jiosy^* raike atao hoe: Akoila, teraka tagny Ponto, izay vô tonga tagny Italia, niaraka tamin’i Prisila vadiny (fa efa nididin’i Klaodio henga tao Rôma aby ny Jiosy^* tao), ka nagnatogna an’izy mivady i Paoly. ³ Die niara-nipetraka tamin-dreo tao izy, sady niaraniasa koa areom fa mpagnano sanjo no asany. ⁴ Nampianatra isaky ny Sabata^* tamin’ny synagoga^* izy, ka nagneky ny Jiosy^* mban’ny olo jentilisa^*. ⁵ Ka laha tafiditra tao Makedonia i Timoty izy amin’i Silasy, die vômeka nitory ny hafatra i Paoly, ka nagnambara tamin’ny Jiosy^* fa i Jesosy no Kristy^*. ⁶ Die nitoerin-dreo izy sady nompainy, die naofakofagny ny lambany sady nagnano hoe: Afa-tsigny aho, avilay ho amin’ny lohanareo eo fezay ny rànareo, manomboka niany die agny amin’olo jentilisa^* laha ny andihanako. ⁷ Ka la nenga teo izy, die nitsofoka tandagnon’ny zalahy raike, atao hoe: I Titosy Josto ny agnarany, mivavaka amin-Jagnahary i le zalahy io, sady ny tragnony lateo nifagnakeky synagoga^*. ⁸ I Krispo, leben’ny amin’ny synagoga^* niaraka tamin’ny fianakaveny marobe die ninino an’ny Tompo aby; ka laha naregny mandy koa ny Korintiana maromaro, die nino ka natao batisa. ⁹ Ndraika aligna, die nijaka tamin’i Paoly tamin’ny tsindrimandry ny Tompo nagnano hoe: Aza mangoaigna, sady aza mangigna, fa mijaka mandy ¹⁰ fa Izaho miaro anao, ka tsisy olo hagnisy ratsy anao izany; fa managn’olo maro amin’ny tanàna ity Aho. ¹¹ Die nipetraka tao taon-draike sy enim-bolagna izy ka nampianatra ny hafantry ny Zagnahary tamin-dreo tao. ¹² Fa raha mbola i Galio no leben’ny governemanta tagny Akaia, die niaraka nagnano fiena ny Jiosy^* hanambotra an’i Paoly, ka nitondra an’azy tamin’ny fitsaràna. ¹³ Ka natany hoe: I lezalahy io nagnentagn’olo hivavaka amin’izao Zagnahary izao, nefa tsy mety amin’ny lalàgna. ¹⁴ Ka raha seka hijaka igny i Paoly, die hozy i Galio nagnontsy an’ny Jiosy^* io hoe: Na misy heloka, na raha ratsy namboarina, die handefitra aminareo aho; ¹⁵ fa raha ady hevitra momban’ny agnaranareo koza, die amboarinareo agny; fa tsy hitsara an?izany aho. ¹⁶ Ka niroahiny hiala teo areo. ¹⁷ Ka nisamborin’izy marobe i Sostena, leben’ny synagoga^*, die nilamolamoin-dreo tagnivon’ny fitsaràna teo. Nefa tsy nahôn’i Galio aby izany.

Nipody tagny Antiokia i Paoly die nanomboka ny die fahatelo

¹⁸ Mbola nitoboka andro maromaro tao mandy i Paoly, ka laha avy nagnano veloma ny mpiaraka mivavaka amin’azy izy, die zay vô nivarigna tan-dakagna^* ho agny Syria, ka i Prisila izy amin’i Akoila niaraka tamin’azy; tagny Kenkrea, no nanarahany ny boriny, satria nisy voady nataony. ¹⁹ Ka ra avy tagny Efososy areo, die nilôzany teo areo mivady, ka lasa i Paoly niditra tamin’ny synagoga’ny^* Jiosy^*, die niady hevitra tao areo. ²⁰ Nangatain’olo tao arỳ hitoboka elaela ao, fa tsy avy izy. ²¹ Ka nagnano veloma izy sady nijaka hoe: Mbola hipody aminareo atỳ aho indraik’andro agny, ra sitrapon’ny Zagnahary. Avy nijaka an’igny izy die nivarigna an-dakagna^* niala tao Efesosy. ²² Laha nitody tagny Kaisaria izy, die niakatra, ka niarahaba ny fengonana, izay vô nidigna nandeha agny Antiokia. ²³ Laha avy nitoboka elaela tao izy, die lasa nandeha nitety ny tagny Galatia mban’ny Frygia ka nankahery ny mpianatra maro be tao.

Tagny Efesosy sy tagny Korinto i Apolosy

²⁴ Tonga tagny Efesosy ny Jiosy^* raika izay, i Apolosy ny agnarane, teraka tagny Aleksandria izy, zalahy mahitsy raha zakaina i zalahy io sady mahay Soratra Masina. ²⁵ I zalahy io, koa efa nampenarina ny lalàgna Anagnahary, sady nafana fo, nasay nijaka sady nampianatra ny marina ny amin’i Jesosy, kanefa ny batisan’i Jaona mandy no fantany. ²⁶ Tam-pasaina no nijakany tamin’ny synagoga^*, ka ra naregny an’azy i Prisila izy amin’i Akoila, die nam-pandrosoiny tan-dragno, ka nampianatra an’azy ny tegna marina ny amin’ny lalàgna Anagnahary. ²⁷ Nagniry ho agny Akaia izy, ny mpiaraka mivavaka amin’azy lateo nandrisika an’azy. Die nampitondraign-dreo taratasy izy, mba handraisan’ny mpianatra agny an’azy tsara. Ka la avy tagny izy die nampatanjaka tsara an’izegny efa nino non’ny fasoavana; ²⁸ nazoto nandresy lahatra an’i Jiosy^* tam-paibemason’olo izy sady nampihariary tamin’ny Soratra Masina fa i Jesosy no Kristy.

TOKO 19   ↑

Paoly agny Efesosy

¹ Ka raha mbola tagny Korinto i Apolosy, die nitety ny faritany ambony i Paoly ka tonga tagny Efesosy, die nahita mpianatra vitsivitsy teo izy, ² ka hoy izy nagnontsy an-dreo: Tamin’ny anareo nino vôlongany ka efa nandray ny Fagnahy Masina va? Ka hoy areo an: Ahay aza tsy maregny aby hoe misy Fagnahy Masina izany. ³ Ka hozy i Paoly: Ka batisa nino arika natao taminareo? Die hoy areo namaly: Batisan’i Jaona. ⁴ Die nijaka i Paoly hoe: Batisan’ny fivalozana no namboarin’i Jaona, fa izy nijaka tamin’olo mba hino ny Olo ho avy afarany die i Jesosy. ⁵ Ka la vatany vô naregny an’izany areo, die avy die natao batisa tamin’ny agnaran’i Jesosy Tompo. ⁶ Laha avy nametrahan’i Paoly tagnana areo, die nilatsaka tamin-dreo ny Fagnahy Masina; ka nahay mijaka tamin’ny fijakana tsy lala areo sady naminagny. ⁷ Ka tokony ho teo amin’ny roy ambe folo lahy teo ny isan-dreo marobe.

Ny niorenan’ny Fengonana tagny Efesosy

⁸ Aviteon’igny i Paoly die niditra tamin’ny synagoga^*, ka nijaka tam-pasaina, sady niady hevitra^XXI telo volagna ka nandresy lahatra ny amin’ny fanjaka-Nagnahary. ⁹ Tsy nagneky ny sasagny ka nivazizitra tamin’ny hevitrany, sady nagnaratsy an’izany fampenaran’izany tamason’olo maro be teo. Die nisaraka tamin-dreo i Paoly, ka nagnavaka mpianatra sady nampianatra an-dreo isan’andro tamin’ny tragno fampenaran’i Tyrano. ¹⁰ Roy taogna gagna no nampenarany tao, ka izegny olo nitoboka tagny Asia, die naregny ny hafatry Zagnahary aby na Jiosy^* na jentilisa^*. ¹¹ Tamin’ny tagnan’i Paoly no nagnamboaran-Jagnahary hazendagnana be nazendagna ny maro. ¹² Ka ny mosarany mban’ny rasikininy mandy no napetagny tamin’ny marary, die nahafaka ny aretinany, sady nivôka ny fagnahy ratsy.

Areo zanakalahin’i Skeva

¹³ Nisy Jiosy^* sasasasagny koa nivengivengy nandrôka fagnahy ratsy, sady nanognona ny Aganran’i Jesosy Tompo tambonin’ny olo managna ny fagnahy ratsy, nagnano hoe: Iaho mandidy anareo amin’ny agnaran’i Jesosy torin’i Paoly io. ¹⁴ Fito mirahalay areo zanak’i Skeva leben’ny mpisorogna Jiosy^*, areo no nagnano an’izay. ¹⁵ Ka namaly i fagnahy ratsy igny nagnano hoe: Fantatro i Jesosy, die fantatro mandy koa i Paoly, ka anareo mba iza? ¹⁶ Nentorahan’ny zalahy nanagna fagnahy ratsy igny areo rôlahy ka resiny, die vaky nilefa tan-dragno tao, sady vôratra areo, no sady niboridagna. ¹⁷ Ka na Jiosy^* na olo jentilisa^* na ny olo izegny mitoboka tagny Efesosy die nafantatra an’izany aby; ka nangoaingna ny olo maro be sady mankalaza ny agnaran’i Jesosy Tompo aby. ¹⁸ Maro tamin-dreo no nino sady nieky, ka samy nijaka ny raha ratsy namboariny aby. ¹⁹ Ka maro koa ny ombiasa nagnary ny odiny^XXII sady nagnangona ny bokiny ka nagnoro an’azy tamason’olo maro be teo; ka ra nitontalena ny tokotokom-bidiny die volafotsy dimy-aligna teo. ²⁰ Niroborobo ôtran’izany ny fandrosôn’ny hafatry Zagnahary mban’ny heriny.

Tabataba tao Efesosy

²¹ Tafarn’io die nanagneritreritra tam-pony tao i Paoly, handeha hamakivaky an’i Makedonia izy amin’i Akaia alohake; zay vô mandeha agny Jerosalema, ka nijaka izy hoe: Laha tonga agny aho, die tsy menty mamangy an’i Rôma mandy koa. ²² Nirahiny andeha ho agny Makedonia ny manafo rôlahy akamany nagnampy an’azy igny, die i Timoty izy amin’i Erasto; fa izy mbola nijanonjagnona tagny Asia andro vitsivitsy. ²³ Tamin’ny andron’io die nisy olagna be ny amin’izany fampenaran’izany. ²⁴ Fa nisy zalahy raike mpanefy volafotsy, i Demetrio ny agnarany, namboariny tamina volafotsy ny sarin’ny tempolin’i Diàna^XXIII, ka nahazo vola be ny mpiasany tamin’izay; ²⁵ die nalagnonany aby ny mpanefy marobe ka nijakany hoe: Eh! Anareo ô! Mba fantatrareo fa tamin’ny alalan’ito no nazaôtsena harembe. ²⁶ Ka sady nahita anareo, naregny fa tsy eto Efesosy eto mandy, fa efa magneragna an’i Asia manontolo, fa magnentagn’olo maro izany Paoly izany ka mamilika ny saignany hoe: Tsy zagnahary izegny raha namboarin’ny tagnan’olombelogna. ²⁷ Ka tsy asa-tagnantsena izao mandy no ataorana anjary tsisy dikany fa na die ny tempolin’i Diàna^XXIV mandy koa die ny zagnahari-vavy lebe: izany die anjary tsisy dikany aby, ka ho afa-bonihitra ny raha ivavahan’i Asia manontolo mban’ny raha ivavahan’i ny olo aby izao. ²⁸ Romotra mafy areo laha naregny an’izany ka nagnantso mafy hoe: Lebe ny Dianan’ny Efesianina! ²⁹ Tsetsela teo die nagneragna an’i tanàna ny tabataba; ka laha nisarika an’i Gaio izy amin’i Aristarko, manafo lahy Makedoniana nagnaradia an’i Paoly areo, die nagnano fiena niriotra ho amin’ny tragno filôlôvana. ³⁰ Te-hiditra ho agny i Paoly ka tsy neken’ny mpianatra. ³¹ Ka nagniraka olo ny lebe sasagny, akamany tagny Asia, mba hagnanatra an’azy tsy hiditra amin’ny tragno filôlôvana agny. ³² Ny sasagny tamin-dreo nagnantso raha raike, ny sasagny koza raha hafa, ny fokon’olo nivory tao mandregnina sady mitabataba; ka na ny akamaroan’olo tao aza die tsy nalala ny antony raha nivorena. ³³ Die nisy nangala tamin’ny fokon’olo teo i Aleksandro, ka ny Jiosy^* nanosika anazy handroso. Nagnokopakopa-tagnana i Aleksandro mba hampangina ny olo, fa hijaka izy, hialatsigny amin’olo. ³⁴ Ka laha fata-dreo fa Jiosy^* izy, die nindraika nirodogna areo marobe nandritrany adiny roy nagnano hoe: Lebe ny Dianan’ny Efesianina! ³⁵ Farany ka nampanginin’ny zalahy mpitan-tsoratra tao ny fokon’olo teo nagnano hoe: Mba tenoinareo ma! Iza no tsy mafantatra fa ny tanànan’ny Efesiana no mpagnasary an’i Diana lebe miaraka amin’ny sarivongagna latsaka avy tagny Jipitera? ³⁶ Raha tsy azo lavina izany, ka tokony hangigna anareo, fa tsy magnanognano fahatany. ³⁷ Nindanareo aty fatany io olo io, nefa olo tsy mba namaky ny tempoly^XXV sady tsy mba nagnompa an’ny zagnaharintsena. ³⁸ Ka ra managna raha zakaina amin’azy anareo a Demetrio, anareo mpanefy koa, die mifagnaraha tsara anareo, ao ny andro fitsaràna, ny fanjakana lateo ao koa. ³⁹ Fa laha, raha hafa eragninareo, die azo tsaraina amina fivorena vôtendrin’ny lalàgna izany. ⁴⁰ Fa raha ny tabataba niany ity, die ataohorana mandy sô die hisy agnapanga antsena, ka tsy ahazo marina amin’ny savorovoro ôtran’izao. ⁴¹ Ka laha avy nijaka an’izany izy die naravainy aby olo teo.

TOKO 20   ↑

Nenga teo Efesosy i Paoly

¹ Ka raha nizanogna ny tabataba die , navorin’i Paoly ny mpianatra ka nanariny tsara sady nataony veloma, die lasa izy nandeha agny Makedonia. ² Ka raha nitety faritany maro izy sady nagnanagnatra olo maro mandy koa, die tonga tagny Grisia. ³ Telo volagna izy nitoboka tao, ka ra seka hivarigna tan-dakagna^* ho agny Syria igny izy, die nisy Jiosy^* nikendry an’azy tsara, nanapa-kevitra tampoka izy ka sala nipody hamaky egna Makedonia. ⁴ Ka niaraka tamin’azy hatragny Asia i Sopatera zanak’ Pyro, avy agny Beria, i Aristarko izy amin’i Sekondo avy agny Tesalônika, i Gaio avy agny Derbe, i Timoty, i Tykiko izy amin’i Trofimo avy agny Asia. ⁵ Neloha aby areo marobe io ka nandigny anay tagny Troasy. ⁶ Die nivarigna tan-dakagna^* ahay nialan’ny Filipy, laha tapitra ny andro finanana ny mofo tsisy levira, ka adin’ny dimy ahay vô tonga tagny Troasy, die fito adiny ahay nitoboka tao. ⁷ Tamin’ny andro vôlongany tamin’ny herignandro, laha tafavory teo aby ahay hizara ny mofo, die nampianatra andreo i Paoly, ka nitohizany hatramin’ny sasakaligna izany. ⁸ Maro ny jiro lateo maro tamin’ny efitragno ambony nivorènay. ⁹ Die nisy manafo lahy raika izay, i Eotyko ny agnarany, nitoboka tam-barangarankely izy ka azontory; nefa ny tori-tenin’i Paoly mbola nadigny ela, nagnadary anefa ny torimasony, ka nidabôka avy tamin’ny efitragno fatelo ambony nivoreny izy ka maty. ¹⁰ Die nijotso i Paoly, ka niondrika taminazy sady nagnohogna an’azy nagnano hoe: Aza magnahy anareo fa mbola misy fiaignana izy itỳ. ¹¹ Die niakatra i Paoly aveon’igny, ka namaky mofo sady nihinagna sady nivoria tao areo mandra-paraignandro, zay vô lasa izy nandeha. ¹² Velogna sômantsara i lezalahy igny tamin’izay ka nindan-dreo nody tamin-kafalena.

Tao Troasy i Paoly, namelogna olo maty

¹³ Nandeha tongotra tam-bohitra i Paoly, fa ahay koja nandeha lakagna^* ho agny Asô, fa eo heno angalanay an’azy zakainy. ¹⁴ Ka laha tafahaogna tao Asô ahay, die niraisinay izy, kà la ahay nandeha tagny Mitylena. ¹⁵ Amaraignan’igny ahay laha nenga teo nandeha lakagna^*, die tonga tandrifin’i kiô; amaraignan’igny koa ahay die nitody tao Samo; ka laha nandraignan’igny vô tonga tagny Mileto ahay. ¹⁶ Fa i Paoly nanagn’eritreritra handalo agny Efesosy mba tsy hijanognan’ela agny Asia; sady izy mienikenika hamonjy ny Pentekosta agny Jerosalema.

nijaka tamin’ny zokiolo tagny Efesosy i Paoly

¹⁷ Ka laha mbola tagny mileto i Paoly, die nampagniraka ho agny Efesosy hangala an’ny zokiolon’ny fengonana tagny. ¹⁸ ka ra tafavory teo areo die nijakany hoe: Hatramin’ny andro natongavako teto Asia vôlongany, die efa fantatrareo ny fitondran-teganko tagnivonareo teo, ¹⁹ fa nanompôko an’ny Tompo tampagnetren-tegna lebe, tamin-dranomaso, ny fangalampagnahy nahazo an’aha tamin’ny fagnenjehan’ny Jiosy^*, ²⁰ ka tsy mba navoniko anareo izegny raha mahatsara anareo, fa nizaraiko taminareo sady nampenariko anareo tam-paibemason’olo isan-tragno; ²¹ sady efa nijakaiko tamin’ny Jiosy^* mban’ny olo jentilisa^* aby ny fifalozana amin-Jagnahary mban’ny finôna an’i Jesosy Kristy^* Tompontsena. ²² Nefa niany aho die terem-pagnahy ho agny Jerosalema, ka tsy lalako ny raha ahazo an’aha agny. ²³ Afa-tsy ny raha zakain’ny Fagnahy Masina amin’aha amin’ny isan-tanàna hoe: Hisy famatorana mbana fijalena ahazo an’aha- ²⁴ Tsisy ataorako aby anefa izany, sady ataoko tsisy diakany ny vatategnako mba ahavitako ny diako, die ny fonompôna niraisiko tamin’i Jesosy Tompo, hampitàko ny filazantsaran’ny fasoavan’Andrianagnahary. ²⁵ Nefa fantatro fa tsy ahita an’aha koa anareo zegny nandihanako nitoriako ny fanjakana. ²⁶ Ka izany no hijakako aminareo niany, fa afa-tsigny amin’ny rànareo aho. ²⁷ Satria tsy navoniko fa nizaiko taminareo aby ny sitrapon’ny Zagnahary. ²⁸ Tandremo tsara ny teganareo mban’ny ondry nampitandremin’ny Fagnahy Masina anareo amin’ny fengonan’ny Zagnahary nividiny tamin’ny ràny. ²⁹ Fantatro fa laha dila aho, die hisy amboadỳ maseka hiditra aminareo, ka tsy hitsitsy ny ondry. ³⁰ Ny sasagny aminareo aza die hitsangagna hampiantra hevi-diso, ka hitarika ny mpainatra hagnaraka an’azy. ³¹ Ka membena tsara, sady tadidio tsara fa telo taogna gagna aho tsy mba nilegnina nagnatra anareo andro amanaligna tamin-dranomasona. ³² Amin’izao anareo die ankiniko amin-Jagnahary miaraka amin’ny raha tsara nijakainy, die Zagnahary mahay mampandroso sady mahay magnome lova ho anareo, miraka amin’izegny efa namasininy. ³³ Tsy mba magniry volofotsy, mbana volamena, mbana raha fitafin’olo aho. ³² Fantatrareo fa ito tagnako ito mandy no nazaôko zegny raha nilaiko mban’izegny raha nilain’ny olo niaraka tamin’aha. ³⁵ Efa nabaribariko taminareo tamin’ny asa marobe nataoko, fa tsy mentsy agnano ôtran’izany koa anareo mba hagnome ny tsy managna, hatserovanareo ny raha nijakain’i Jesosy Tompo igny magnano hoe: Tegna mahasambatra ny magnome toy izay ny mandray. ³⁶ Ka laha avy nijaka an’izany izy, die nandoalika sady niaraka nivavaka areo marobe. ³⁷ Die nigogogogo nitomagny areo marobe sady namihigna ny vozognan’i Paoly ka nagnoroka an’azy, ³⁸ sady nalahelo lôtra areo tamin’ny nijakany ny hoe tsy ahita an’aha koa anareo, die naterindreo tan-dakagna^* izy.

TOKO 21   ↑

Ny niaven’i Paoly tagny Jerosalema sy ny raha namboariny mba hampihenga ny tsy fitiavan’ny Kristiana an’azy tagny Palestina

¹ Ka laha tafasaraka tamin’azy ahay die nivarigna tan-dakagna^* ho agny kosy, ka ampitson’igny die avy tagny Rodo, die niala tao ahay ka nenga tagny Patarà. ² Laha nahita lakagna^* hitsaka ho agny Foinika ahay, die nandika ka lasa nandeha. ³ Ka laha nahatsinjo an’i Kyprosy ahay die nandalo tankaviany sady nenga tagny Syria, die nizanogna tao Tyro sady tao no nitaterana ny entagna tan-dakagna^*. ⁴ Die nandremby mpianatra ahay ka nahita, nibela teo fito andro ahay, ka voatsindrin’ny Fagnahy Masina areo hijaka amin’i Paoly mba tsy hiakatra angy Jerosalema. ⁵ Laha tapitra andro io die nenga ahay, ka areo mivady aby mianaka aby, nagnatitra anay hatambelagn’ny tanàna. Die nandoalika ahay nivavaka tamoron-dranomasina teo. ⁶ Ka laha avy nifagnano veloma ahay die nivarigna tan-dakagna^* fa areo koja nipody nody. ⁷ Farany nandihananay tan-dakagna^* die tagny Tolemaia, lefa avy tagny Tyro, nagnotsafa ny rahalahy amin-dray ahay die nitobòka tao andro raike. ⁸ Ny ampitson’igny die nenga teo ahay ka tonga tagny Kaisaria die niditre tan-dragnon’i Filipo evanjelista raike amin’izy fito lahy die nitoboka tamin’azy tao ahay. ⁹ Nanagn’anaka viavy efatre mbola tsy nalala lilahy zalahy io, ka naminagny. ¹⁰ Ka laha nitoboka tao andro maro ahay, die nisy mpaminagny raike atao hoe: Agabo nijotso hatagny Jodia. ¹¹ Ka laha avy tamin’nay teo izy die nalainy ny fehinkibon’i Paoly, ka namihezany ny hongony aman-tagnany mban’ny aignane. Die Hoy izy: Izao no nijakain’i Fagnahy Masina, hôtran’izao no hamihejan’ny Jiosy agny Jerosalema ny lelahy Tompon’itoy fehinkibo itoy ka hotolony an-tagnan’ny olo jentilisa^* ariky. ¹² Ka laha regninay izany die nangataka tamin’azy ahay mban’ny olo nonigna teo mba tsy hikarane agny Jerosalema. ¹³ Fa i Paoly namaly ka nagnano hoe: Ka ino mampitomagny anareo ka mampangotso ka ny foko ôtran’io. Efa vognona aho, tsy ny hifihejina mandy fa ny ho faty agny Jerosalema mandy koa mba hovoninahitry ny agnaran’i Jesosy Tompo. ¹⁴ Ka laha tsy nagneky izy die niegnina ahay ka nagnano hoe: Ôka ny sitrapon’i Tompo no hatao.

Tagny Jerosalema i Paoly ary nandeha namangy an’i Jakoba

¹⁵ Ka laha afaka ny andron’io die namehe entagna ahay ka niakatre ho agny Jerosalema. ¹⁶ Die niaraka taminay koa ny mpianatra saragny avy tagny Kaisaria izay nitondra anay ho agny amin’i Menasogna, olo avy laha tamin’ny Kyprosy sady efa mpianatra andrakaly nikendrenay hitobohana. ¹⁷ Ka laha avy tagny Jerosalema ahay die nandray anay tan-karavôna ny mpiara-mivavaka. ¹⁸ Amaraignan’igny die niaraka niditra tagny amin’i Jakoba ahay amin’i Paoly ka tafangona tao aby ny zokizokiolo marobe. ¹⁹ Ka lefa niarahaba an’azy Paoly die nitantara tsiraidraike ny raha maro be nampanôvin-Jagnahary an’azy tamin’ny olo Jentilisa^* tagny. ²⁰ ka laha naharegny an’izany areo die nankalaza an’Agnahary ka hoy izy tamin’i Paoly: Hitanao izao, a lehano, fa efa agnalignalgna ny Jiosy^* efa mino, sady tegna mitandrina ny lalàna izy marobe, ²¹ sady efa regnin’olo ny aminao, fa anao hono, mampianatra ny Jiosy^* marobe agny amin’ny Jentilisa,^* hahafoy an’i Mosesy ka mandrara an’azy tsy hamora ny zaza na hagnaraka ny fomba-drazagna. ²² Die akory ny atao? Tsy mentsy ho regniny ny nevanao. ²³ Ka laha izany die atôvy izao raha hijakainay amin-izao hoe: Misy efa dahy atoy efa nifanta. ²⁴ Reso areo ka diovy miaraka amin’azy ny tegnanao die aloavy ny vola ho lany amin’ny fagnitsìhany ny tegnany. Ka die ho fantatr’olo maro be fa tsisy dikany ny raha namokisana an’azy ny aminao fa anao aza mandeha magnaraka ny lalàgna koa. ²⁵ Fa laha ny amin’olo Jentilisa^* izegny efa mino, die efa nampitondra taratasy ahay mandidy hifady ny hena aterina amin’ny sampy mbana rà, mbana raha kindaina miaraka amin’ny fijangajangàna. ²⁶ Die nalain’i Paoly i manafolahy io, ka ampitson’igny die nandio tegna niaraka tamin-dreo izy ka niditra tao ankianjan’ny tempoly^* nagnambara ny fahavitan’ny andro fandiovana mandra-pagnaterana ny sorogna ho an’ny isan-dahy.

Ny nanamborana an’i Paoly sy ny teny nalahany tamin’izany

²⁷ Ka lefa ho tapitre ny andro fahafito, die nahita an’i Paoly teo an-kianjan’ny tempoly^* ny Jiosy avy tagny Asia ka nampikorontagna ny fokon’olo marobe areo sady nanambotre an’i Paoly. ²⁸ Ka die nangaike hoe: Malaky lakatagny aby anareo lelahin’Israely, fa io zalahy io mampianatr’olo amin’ny tany aby io, hanohitre ny olo Israely mban’ny lalànany miaraka amin’ito tragno masina ito, sady mapiditra ny olo Jentilisa^* io tankianjan’ny tempoly^* izy ka nagnota an’ito tragno masina ito. ²⁹ Fa efa hitany laha teo fa niaraka tamin’azy tan-tanànan’ny Trofimo Efesiana ka neveriny fa nampidirin’i Paoly tan-kianjan’ny tempoly^* teo izy. ³⁰ Ka die nisavoritaka be ny tan-tanàna tao ka nihajakajaka ny olo nivory, die i Paoly nisamborine sady nirodrotiny henga tankianjan’ny tempoly^* teo, avy die nahidine ny varangarambe. ³¹ Ka laha seka hamono an’azy ny olo, die nisy nitondra teny tagny amin’ny ampifehe arivo tamin’ny antokona maramila, nijaka fa mitabataba aby ny fokon’olo amin’ny Jerosalema. ³² Vatany vô naharegny an’io izy die nangala maramila mbana Kapiteny ka nihajakajaka nandrorogna ho agny; ka laha nahita ny ampifehe arivo mban’ny maramila ny olo die niegnina tsy namango an’i Paoly koa. ³³ Ka nagnantogna ny ampifehy arivo die nanambotra an’azy ka nibeko mba hamatorana an’azy amina rojovỳ roy , sady nagnontany hoe: Ka iza izy? Die ino raha nataony? ³⁴ Maro tamin’olo sasagny nijaka raha nitovy, ny sasagny koja raha hafa, ka laha tsy azony lagniny ny marina ny amin’ny raha nampifandevilevy andreo, die nampitondraigny agnaty lapa i Paoly. ³⁵ Ka lefa avy teo amin’ny ambaratongampahefana izy die nibatain’ny maramila fa maro lôtra ny olo nifanositosika teo. ³⁶ Maro ny olo nagnaraka sady nangaingaika hoe: Vonio agny i lehano io.

Mandahatra ny fiarovan-tenany i Paoly

³⁷ Ka laha nindaony tagnatin’ny ny lapa tagny i Paoly die hoy izy tamin’ny ampifehy arivo hoe: Mba mahazo mijaka aminao ve aho? Die hoy izy ka mahay teny Grika anao an? ³⁸ Ka tsy anao ma! Izalahy Egiptiana nampikorontagna olo taloha elabe igny an? Sady nitarika ny efatrarivo lahy mpitondra lefom-pohike nenga tan-tèty tagny igny? ³⁹ Ka hoy Paoly an: Jiosy^* avy agny Tartôsy lata-Kilikia aho, tompon-tany amin’ny tanàna tsy kely laza, ka die ho ela velogna anao, abilay aho mba hijaka amin’ny fokonolo. ⁴⁰ Ka laha nabelany i Paoly die nitsangagna teo amin’ny ambaratongam- pahefàna ka nagnopakopa-tagnana tamin’olo, ka laha nangigna tsara ny olo die nijaka mahare be tamin’ny teny hebreo izy nagnano hoe:

TOKO 22   ↑

Ny nisamborana an’i Paoly sy ny teny nalahany tamin’izay

¹ Anareo rahalahy amin-dray, mba tenoy ny teny halahatro aminareo eto niany mba hangalako tsigny ny tegnako. ² Ka laha regnin’olo fa zaka amin’ny fijakana Hebreo^XXVI no nijakàny tamindreo die samby nangigna aby areo; ka hoy i Paoly: ³ Aho die lelahy Jiosy^* teraka tagny Tarsosy agny Kilikia, fa teto amin’ny itoy tanàna itoy no naha lihibe an’aha tagnilan’ny tongotr’i Gamaliela, die nampenarina tsara ny lalàna avy tamin’ny razagna aho, die najoto tegnany tamin’ny fanampoana an-Jagnahary ôtranareo io aby. ⁴ Nagnenjika an’izegny nagneke an’io fampenarana io aho mandrapahafaty an’azy aza ndre, die namatotra andreo sady namehy tady na lilahy na viavy, ka nadefa an’azy hatao an-dragno mezigna, ⁵ ka ny leben’ny mpisoragna mban’ny zokiolo io aby no vavolombelogna an’izany, sady areo no nandresako taratasy ho amin’ny zalahy reo, die nenga tagny Damaskosy aho, mba ho feheziko tady ho agny Jerosalema koa izegny tratrako teo mba hampijalena.

Mitantara ny fiovam-pony i Paoly

⁶ Ka laha nandeha aho, narivo an’i Damaskosy, tamin’ny igny antoandroben’Agnahary igny, die nisy mazava angezabe nagnelatrelatre tampoka avy laha tan-dagnitra tagny nagnodidigna an’ahy. ⁷ Die lavo tamin’ny tany aho ka naharegny feo nijaka tamin’ahy nagnano hoe: E! Saoly, e! Saoly, nagnino anao magnenjika an’Aha? ⁸ Aho moa namaly hoe: Iza ma anao azafady?^XXVII Die hoy izy tamin’aha: Aho no Jesosy avy agny Nazareta injehinao io ka izagny niaraka tamin’aha die nahita ny raha mazava igny aby fa tsy naharegny ny feon’olo nijaka tamin’aha. ¹⁰ Die hoy aho an! Tompoko! Ino hataoko? Die hoy ny Tompo hagnontsy an’aha: Mitsangagna ka mandihana agny Damaskosy, fa agny no zakaina aminao ny raha aby efa vôtendre hataonao. ¹¹ Ka laha tsy nahajaha aho noho ny famirapiratan’ny raha mazavabe igny die nitantanan’ny zalahay niaraka tamin’aha aho ka tonga tagny Damaskosy. ¹² Ny zalahy raike atao hoe: Ananiasy ampivavaka magnaraka ny Lalàgna sady tsara laza tamin’ny Jiosy marobe mitoboka tao, ¹³ no nagnantogna an’aha ary nitsangagna ka nagnano hoe: E! Saoly rahalahy! Mahiràta. Ka tamin’io fotoana io die nahiratra aho ka nahita an’azy. ¹⁴ Die hoy izy an: Zagnaharin’ny razantsena anik’efa nanendre anao hahafantatre ny sitrapony sady hahita an’i Raike Marina sady hiteno ny zaka hijakain’ny vavane. ¹⁵ Fa ho vavolombelogna amin’ny olo aby izao anao ny amin’ny raha efa hitanao sady regninao. ¹⁶ Ka ino raha mbola mampijanogna anao eo? Mitsangàna, angiho ny agnarane die ôka hahatao batisa anao ka hisasàna ho afaka amin’ny faotanao. ¹⁷ Ka laha avy tagny Jerosalema indraike koa aho, ka nivavake tan-kianjan’ny tempoly^* teo die azon’ny tsindrimandre. ¹⁸ Ka nahita an’Azy nijaka an’aha hoe: Malakisa anao ka mivoaha agny Jerosalema malaky fa tsy hadray ny fagnambaranao an’Ahy areo. ¹⁹ Die hoy aho: Azafady Tompoko, areo anieka mahalala fa ny mpino Anao, die nampidiriko am-pigadrana sady nifihiko tamin’ny synagoga^* tao aby. ²⁰ Ka laha nalatsa-drà i Stefana maritirinao, aho die mba nitsangagna teo mandy koa ka nagneke sady nagnaramaso ny olo namono an’azy. ²¹ Die hoy Izy nagnontsy anaha: Mandihana fa Aho magniraka anao handeha lavitre agny amin’olo Jentilisa^*.

I Paoly sy ny ampifehy arivo

²² Ka ny olo niteno an’azy nanomboka teo, die nagnaka-peo sady nagnano hoe: Fohagny agny lehano io fa tsy tokony ho velogna eto io. ²³ Ka laha nagneke izy sady nangala ny lambane, ka laha avy nanipy bon-tany amin’ny rivotra izy . ²⁴ Die nampandehanin’ny ampifehy arivo lahy agny an-dapa i Paoly, die nifìhiny sady nadikadininy mba hahafantarany ny fototry ny nagnorakorahan’olo an’azy hôtran’io. ²⁵ Ka laha mbola nifihezin-dreo tamin’ny tady hoditra arỳ, die hoy Paoly nagnontsy an’i Kapiteny nitsangagna narivo teo, mety aminareo ny mamioka lelahay rômana mbola tsy vôheloka va? ²⁶ Ka laha naharegny an’izany ny Kapiteny die nijaka tamin’ny ampifehe arivo lahy, nagnano hoe: Ino toy raha hataonao toy, Rômana an’io lelahy io? ²⁷ Die nagnantogna an’azy teo ny ampifehe arivo lahy ka nijaka tamin’azy hoe: Zakay amin’aha hoe tegna Rômana tegnany anao va? Die hoy izy: Eka! ²⁸ Namaly ny mpifehe arivo lahy hoe: Volabe no nahazoako an’io voninahitra io. Fa hoy Paoly an: Vô teraka aho die efa nanagna an’izany. ²⁹ Ndre ny olo seka hagnontany an’azy io nenga aby nangoaina koa ny ampifehy arivo lahy, laha nahafantatra an’azy fa Rômana satria areo lateo nampisambotra an’azy.

TOKO 23   ↑

Ny nandaharan’i Paoly teny tan-katrehan’ny Synedriona

¹ Nipisagnin’i Paoly tsara ny syndriona^* ka hoy izy an: Ry rahalahy, aho anie ka nanompo an’Agnahary tamin’ny fieritreretana tsara hatram’izao. ² Ka i Ananiasy ampisorombe nandidy ny olo narivorivo an’azy teo hametrika ny vavany. ³ Ka hoy Paoly tamin’azy: Zagnahary koa mba hamely anao, a! Vongambato vôloko fotsy tỳ, fa anao die mitoboka tsara hitsara an’aha araka ny lalàgna nefa bekoinao hifihina tsy ara-dalàgna aho? ⁴ Ka zegny nitsangagna teo die nagnano hoe: Ka hanevateva ny mpisoromben’Agnahary anao an? ⁵ Die hoy Paoly: Tsy fantatro hoe ampisorombe izy ry rahalahy, fa vôsoratra hoe: Aza magnompa ny ampitondra ny firenenao.^{XXVIII 6} Ka laha fantatr’i Paoly fa Sadoseo^* ny sasagny tamin-dreo sady Fariseo^* die nangaike Syndriona^* teo izy nagnano hoe: Eh! Rahalahiko ô! Aho die Fariseo^*, zanaka Fariseo^*, ny amin’ny fagnantegnana mban’ny fitsanganan’ny maty no itsarana an’aha. ⁷ Ka laha avy nijaka an’izay izy die nenkany ny Fariseo^* mban’ny Sadoseo^* teo ka die nijara roy tonta ny olo marobe teo igny. ⁸ Fa ny Sadoseo^* nagnano hoe: Tsisy fitsanganana amin’ny maty izany sady tsy ho hisy mihitsy anjely na fagnahy, fa ny Fariseo^* koja die magneky an’izany aby. ⁹ Ka die nandregnina ny antsoantso tao, die ny mpanora dalàgna saragny, agn’isan’ny antokon’ny atao hoe: Fariseo^*, nitsangagna ka niharagna hevitre ka nagnano hoe: Tsy hitanay izegny helok’io zalahy io fa sô die mba fagnahy na anjely no nijaka tamin’azy. ¹⁰ Ka laha mbola nitabataba be mandy areo die natahotre ny ampifehy arivo lahy sao die hifandrorotan’olo i Paoly ka ho voa rà, die nampidigniny ny maramila mba hangala an’azy forosé henga tagnivon-dreo teo mba hitondra an’azy ho agny agnaty rova. ¹¹ Die ny Tompo nijoro tagnilany teo tamin’ny alignan’igny ka nagnano hoe: Matokisa fa ôtran’ny nagnambaranao an’Aha tagny Jerosalema no mbola hagnambaranao an’Aha agny Rôma koa.

Ny namindràna an’i Paoly ho agny Kaisaria mba tsy hoazon’izay efa nifanta hahafaty an’azy

¹² Ka laha nandraigna die nagnano fiena aby ny Jiosy^* ka nagnozogna sady nifantafanta tsy hihigna na hinon-drano areo mandra-pamgnoany an’i Paoly. ¹³ Efapolo eo ho eo areo niaraka nagnano fiena. ¹⁴ Die nenga tragny amin’ny ampisorombe mban’ny loholo areo ka nagnano hoe: Efa nihozongozogna areo sady nifanta fa tsy hagnandran-draha mihintsy, ninonino, mandram-pamonôndreo an’i Paoly. ¹⁵ Ka niany mandy anareo die mijakà amin’ny ampifehe arivo lahy miaraka amin’ny Synedriona^* mba hampandeha an’azy aminareo atoy, mody sary hoe tahamotopototre amin’azy marina ny amin’ny raha nataone; fa ahay io die efa vognona ny hamono an’azy dieny tsy mbola marivo agny izy. ¹⁶ Ka laha vô regnin’i zanak’anakavin’i Paoly ny fagnotrehan-dreo die lasa negna agnaty rova izy ka nijaka tamin’i Paoly. ¹⁷ Nangaika kapiteny raika hoamin’azy teo i Paoly die nagnano hoe: Andôsy menga agny amin’ny ampifehe arivo lahy ito lezalahy ito fa misy raha zakainy amin’azy. ¹⁸ Die nindaon’ny kapiteny izy ho agny amin’ny ampifehy arivo lahy die hoy izy nagnontsy an’azy: I Paoly vôfatotra no nangaika an’aha hagnantognan’azy ka nangataka tamin’aha mba hitondra an’ny lezalahy ity ho aminareo atoy, fa managna ra ka zakaina aminao, hoe izy. ¹⁹ Die nindan’ny ampifehy arivo lahy izy, ka lefa nitokagna tamin’ny mangingigna areo, die nagnontanèny hoe: Ka ino raha hijakainao amin’aha zany? ²⁰ Die hoy ilezalahe igny: Ny Jiosy^* any k’efa nifagneky hangataka aminao atoy, hampijotso an’i Paoly ho amin’ny Synedriona^* ampitso, mody sary hagnadigna an’azy laha tegna marina tokôtre. ²¹ Ka aza magneke an’izany anao, fa misy hatramin’ny efapolo lahy areo nagnano fiena hanambotra Paoly, efa nagnozontegna sady nifanta areo fa tsy hinan-kanina na hinon-drano laha tsy maty arỳ, efa vognona areo fa mandigny ny fanapakakevitrao fotsiny. ²² Ka ny ampifehe arivo lahy nampandeha an’i lezalahy io sady nampitandrina an’azy hoe: Aza mijaka amin’olo fa hoe efa nijakainao tamin’aha taty izany.

Nifindra tany Kaïsaria i Paoly

²³ Die nagnantso Kapiteny roalahy izy hagnantagnan’azy teo, ka nagnano hoe: Magnomagna maramila roan-jato lahy aman-tsôvaly fito-polo mbana mpiloka lefogna roan-jato ho agny Kaïsaria niany aligna amin’ny ora fahatelo. ²⁴ Die itondray biby koa hidibàn’i Paoly, hitondra an’azy sôman-tsara ho agny amin’i Felix ampanapaka. ²⁵ Die nanoratra taratasy izy, ka ôtran’izao ny raha nijakainy tao: ²⁶ Klaodio Lysia miarahaba an’i Felix ampanapake tsara tsy magnahy. ²⁷ Itoy lelahy itoy, die nisamborin’ny Jiosy^*, k’efa saky novonin-dreo, fa fantako fa Rômana izy, die nitondrako maramila hagnavotra an’azy. ²⁸ Ka satria te-halala tsara ny antony nempanga na an’azy aho die nindaoka teo amin’ny Synedriona^* izy. ²⁹ Die hitako, fa adi-hevitre momban’ny lalàgnan-dreo no nempangane an’azy fa tsisy fepangana tokony hahafaty an’azy na hamihezana tady an’azy mihintsy. ³⁰ Ka laha nisy nijaka tamin’aha, fa nisy mihevitre hanambotre an’ny zalahy io die nagniraka malaky aho hitondra an’azy aty aminao mban’ny ampempanga koa nalefako hilaza aty aminao ny antony empangana an’azy. ³¹ Die nalain’ny maramila i Paoly araka nandidiana an’azy, die nindaon-dreo tamin’ny alignan’igny mandy ho agny Antipatria. ³² Amaraignan’igny die navelane handeha hiaraka tamin’ny ampitondra sôvaly izy ka areo koja nipody an-dapa. ³³ Lafa tonga ta-Kaisaria areo die nanolotra ny taratany tamin’ny ampanapaka ny taratasy sady nanolotra an’i Paoly fampelatagnany. ³⁴ Laha nivakiny le taratasy die nagnontaneny izay fari-panapahana nevien-dreo. Ka laha fantany fa kay avy laha ta-kilikila izy. ³⁵ Die hoy izy: Hitenôka tsara ny raha zakainao , lefa avy atoy ny ampempanga anao. Die nampembeniny tan-dapan’i Herôda tao izy.

TOKO 24   ↑

Ny nitsarana an’i Paoly tan-katrehan’i Feliksa sy ny namatôrana an’azy roy taogna tao Kaisaria

¹ Laha afaka dimy andro die nandrorogna i Ananiasy ampisorom-be niaraka tamin’ny loholo sasagny die i Tertylo, die teo koa ny vavanjaka raike, io no nagnatoro tamin’ny ampanapake ny nempangany an’i Paoly. ² Ka lefa nangihana izy die nagnampanga an’azy i Tertylo, nanagno hoe: ³ Anao no hazahoanay fiandagnanbe, sady tamin’ny fitondranao no nampilamina an’ity firenena ity, isanandro isanandro die ekenay fezay zany a Felix tsara fagnahy ô! ⁴ Ho lava velomanao anie anao! Mba tsy hanahiragnako anao ela lôtra die maharetra bitaka eheky anao alohake. ⁵ Fa io zalahy io die hitanay fa tegna ratsy loha sady magnakorotagna an’ny Jiosy^* marobe amin’ny tany aby io, sady izy no tegna lohany amin’ny antoko atao hoe: Nazareanina. ⁶ Izy io koa die saky handoto tempoly^* ka die nisamborinay izy ka tianay ho tsaraina araka ny lalagnànay. ⁷ Fa avy i Lysia ampifehy arivo lahy nagnao an-keriny ka nangala agnazy tan-tagnanay die nelafany aminao atoy ny ampempanga an’azy. ⁸ Ka laha magnadigna an’azy anao die hofantatrao aby marina ny raha empanganay an’azy. ⁹ Ny Jiosy^* mandy koa die magneke sady mijaka izany.

Mandahatra ny fiarovan-tenany agnatrehan’i Feliksa governora i Paoly

¹⁰ Laha nitondroin’ny ampanapaka hijaka i Paoly die namaly ka nagnano hoe: Fantatro anao, die efa ampitsara ela tamin’ny itoy firenena itoy, ka die faly aho handaha fa teny hangala tsigny ny tegnako. ¹¹ Fa azonao fantarina mora fa tsy mba nihôtra ny roy ambin’ny folo andro ‘zay no nekarako hivavaka tagny Jerosalema. ¹² Sady mbola tsisy nahita an’aha niadihevitra tamin’ny olo tan-kianjan’ny tempoly^* na nagnakorotagn’olo tamin’ny synagoga^*, na tan-tanana. ¹³ Sady tsy sainy ny hagnamarina agnivonao eto ny raha empangany an’aha io. ¹⁴ Fa ny ikeko aminao eto die izao, araka ny fampenarana zakainy hoe mitokogna no anompôko an’Agnaharay ny razako, sady hinôko aby ny raha vôsoratry ny lalàgna mban’ny ampaminagne, ¹⁵ sady magnantena an’Agnahary aho izay antignain’dreo koa fa hisy fitsanganan’ny marina mban’ny diso^XXIX. ¹⁶ Ka magnalignandro koa aho die miezaka mba hanagna fieritreretana tsy hagnameloka an’ahy, na amin’Agnahary izany na amin’olombelogna. ¹⁷ Ka laha afaka taogna maro aho die nitondra fitia tsy mba hetra ho an’ny fireneko. ¹⁸ Tamin’ny izay die hitany vôdio tankianjan’tempoly^* teo aho, nefa tsy tamin’ny olo-maro, na tamin’ny tabataba; fa tamin’ny Jiosy^* sasagny avy tagny Asia. ¹⁹ Tokony hiboaka tagnivonao eto areo io mba hempanga an’ahy, laha ohatra ka hisy raha hempangany an’aha. ²⁰ Na ôka ito olo ito mandy no hijaka ny raha ratsy hitany, laha nitsangagna tagnivon’ny Synedriona aho. ²¹ Afatsy raha raike itoy mandy; die raha nijakaiko tagnivony teo hoe: Ny amin’ny fitsanganan’ny maty no antony itsàrana an’ahy, eto agnivonareo eto niany.

I Paoly babo tagny Sezarea

²² Ka satria fantatr’i Felix tsara ny amin’ny izany lalàm-papianarana izany, die nampengainy aby areo alohake, ka nagnano hoe: Lefa tafajotso atoy a Lysia ny ampifehe arivo lahy die hofotopotorako tsara ny fandehan-darahanareo. ²³ F’izy nandidy ny Kapiteny hiambigna an’i Paoly sady hagnabela an’azy hitsangantsangagna ka tsy handrara olo na die raike amin’ny akamany izay hoavy hanompo an’azy. ²⁴ Ka laha afaka andro vitsivitsy die avy i Felix izy amin’i Drosila vadiny, viavy Jiosy^*, die nampangala an’i Paoly izy ka niteno an’azy nitory ny finoana an’i Kristy Jesosy. ²⁵ Ka laha nitory ny amin’ny fahamarinana amam-pionônana mban’ny fitsarana hoavy izy, die nangoaigna mafy i Felix ka namaly nagnano hoe: mandehana menga alohake fa laha malalaka die mampangala anao mandy koa aho. ²⁶ Sady nagnategna koa izy fa homen’i Paoly vola ka die nampangala an’azy matetika ka nikoragna tamin’azy. ²⁷ Laha afaka roa taogna die i Porsio Festosy no nandimby an’i Felix. Satria i Felix tehahazo sitraka tamin’ny Jiosy^* ka die nabelany nifatotra teo mandy i Paoly.

TOKO 25   ↑

Nataon’ny Jiosy ny hahafaty an’i Paoly sady nangatahany hotsarain’i Kaisara

¹ Ka i Festosy, lefa tonga teo amin’ny fitondrany die nenga tagny Kaisaria hiakatra agny Jerosalema laha afaka telo andro. ² Ka ny lehiben’ny mpisorogna mban’ny olo-manan-kaja tamin’ny Jiosy^* die nagnambara tamin’azy, zegny niampangàny an’i Paoly sady nengavy tamin’azy. ³ Ka nagataka an’azy mba homelohina sady hampangalan’azy agny Jerosalema; fa nagniry hiambigna egny amoron-dalana areo hamonoany an’azy. ⁴ Ka namaly Festosy fa i Paoly die ambenana agny Kaisaria, sady izy laha teo negna tagny nalaky. ⁵ K’izegny manam-pahefana amin’nareo eo, hoy izy, no ôka hiaraka mandrorôna amin’ahy agny ka hepanga an’io zalahy io laha manan-kadisovana izy. ⁶ Ka laha nitoboka tamin’azy teo tsy nihoatra ny valo andro na folo andro izy die nandrorogna tagny Kaisaria ka ampitson’igny, die nitoboka tamin’ny fitsaràna izy, ka nampangalaina Paoly. ⁷ Laha tonga izy, die nitsangagna nagnodidigna an’azy teo ny Jiosy^* avy lahatà Jerosalema, ka marobe sady angeza tsy hainy hamarinina aby ny fagnendrikindrehany an’azy. ⁸ F’i Paoly nandamina ny fijakany hialatsigny ny tegnany nagnano hoe: Tsy nagnano ratsy aho, na tamin’ny lalàn’ny Jiosy^*, na tamin’ny tempoly^*, na tamin’ny Kaisara. ⁹ Nefa i Festosy die tahahazo rariny amin’ny Jiosy^* die namaly an’i Paoly hoe: Ka tienao hakarina a Jerosalema agny izy ity hotsaraina, die eo ankatrehako eo anao amin’ny izany raha izany an? ¹⁰ De hoy Paoly: Eto amin’ny fitsaranan’i Kaisara izay tokony hitsarana an’aha, no itsanganako, tsy mba nagnisy ratsy ny Jiosy^* aho, sady ndre anao io die mahafantatra an’izany tsara. ¹¹Ka laha mpagnano ratsy aho, na nagnano raha tokony hahafaty an’ahy. Die tsy manitsy ho faty aho, fa laha tsy marina ny raha agnendrikendrenareo an’ahy die tsisy olo afaka hanolotra an’ahy amin’ny sitrapony. Handahatra an-katrehan’i Kaisara aho. ¹² Laha avy nivoria tamin’ny mpanolo-tsaigna Festosy die namaly hoe: Efa nifidy ny handahatra eo ankatrehan’i Kaisara anao ka die ho any amin’ny Kaisara mandy anao zany.

Ny nanharan’i Paoly zaka tan-katrehan’i Agripa sy Berenika

¹³ Ka laha afaka andro kelikely die tonga tagny Kaisaria Agripa ampanjaka, izy amin’ny Berenika hifagnotsafa an’i Festosy. ¹⁴ Laha avy nitoboka tao andro maromaro izy. Die nijakan’i Festosy tamin’ny ampanjaka ny amin’i Paoly ka hoy izy: Misy mpifatotra raike ato nabelan’i Feliksa. ¹⁵ Tamin’ny aho ta-Jerosalema die ny ampisorogna mban’ny lohandohany amin’ny Jiosy^* no nagnendrikendrika an’azy ka nangatahin-dreo ny hagnamelohana an’azy. ¹⁶ Fa nivaleko izy hoe: Tsy fomban’i Rômanina ny manolotra olo, raha tsy mbola nifagnatrika ny ampangaina mban’ny mpempanga ka mahazo madahatra izy hangala tsiny ny tegnany amin’ny raha niempangan-dreo an’azy. ¹⁷ Ka laha avy taty izy, die tsy mba nilegnindegnina aho, fa amaraignan’igny die nitoboka tamin’ny fitsarana ka nampangalaiko i lezalahy io. ¹⁸ Laha nitsangagna ny mpempanga an’azy die tsy niempanga an’azy araka ny raha namboariny izy anefa, ¹⁹ fa nanangagna adihevitra tamin’azy ny amin’ny fivavahany, mban’i Jesosy tokana izay efa mate, nefa nijakain’i Paoly fa mbola velogna. ²⁰ Satria sahiragna lôtra ny heritreritro ny amin’ny hitsarana an’izany raha izany die nagnontany aho na mety amin’ny lezalahay io ny hitsarana an’azy agny Jerosalema na tsy mety. ²¹ Lefa nangataka hambenana hotsarain’ny ampanjaka Paoly die nampiambeniko mandrapandefasako an’azy agny amin’ny Kaisara. ²² Die hoy Agripa tamin’i Festosy: Iaho koa mba te-haregny ny amin’ny lezalahay izany! Die hoy izy: Ampitso mandy die haharegny an’azy anao. ²³ Ny ampitson’igny die tonga i Agripa izy amin’i Berenika niseho tamin’ny voninahiny mban’ny fanjakany ka niditra tandragno fihôgnana niaraka tamin’ny mpifehy arivo lahy niaraka tamin’ny lehibe tao an-tanàna, die nindaony i Paoly araka ny didin’i Festosy. ²⁴ Die hoy i Festosy: E! Agripa ampanjaka, anareo aby amintsena eto. Hitanareo lezalahay io, nampitoreo ny Jiosy^* marobe tamin’aha teto io na tagny Jerosalema koa aza, ka nagnanôvan-dreo kok’ambo hoe: Tsy tokony habela velogna eto koa i lelahy io. ²⁵ Nefa hitako fa tsisy raha nataony tokony namonoana an’azy, tiny! Izy moa nagnano fandaharana tamin’ny ampanjaka die nagneky ny hampagnatitra an’azy aho. ²⁶ Ny amin’ny io lezalahay io, die tsy hitako marina ny raha hosoratako ho aminao tompoko, ka die nandaoko eto agnatrehanareo eto izy, indrindrake fa eto agnatrehanao a! Agripa ampanjaka, mba hagnontaniana izy ka hohitako ny raha hisoratako. ²⁷ Fa everiko fa tsy mety ny mampagnatitre ampifatotra nefa tsy mijaka ny raha antony nempangana anazy.

TOKO 26   ↑

Ny hevitry Jiosy mba hahafateseny an’i Paoly sy nangatahan’i Paoly hotsarain’i Kaisara

¹ Die hoy i Agripa tamin’i Paoly: Mahazo mijaka anao. Die naninjitra ny tagnany i Paoly ka nandahateny hangala ny tsigny ny tegnany hoe:

Lahatenin’i Paoly teo amin’i Agripa mpanjaka

² ny amin’ny raha agnedrikendrehan’ny Jiosy^* an’aha ry Agripa ampanjaka die everiko fa sambatra aho, satria mahazo mandaha teny hangalako tsigny ny tegnako eto agnatrehanao niany. ³ F’indrindra fa efa fantatrao tsara ny fatao amin’ny fiadian-kevitra marobe amin’ny Jiosy^*, ka hoelavelogna anie anao, ka mba negavy anao aho mba hadigny hiteno an’ahy azafady. ⁴ Fantatry ny Jiosy^* aby dahôlo ny fitondran-tegnako hatrmin’ny aho mbola bitake teto amin’ny fireneko ta Jerosalema hatam-bôlohany. ⁵ Eka, fantany hatam-bôlohany aho laha hilaza areo fa efa Fariseo^* aho araka ny antoko, sady tena mpitagna die mpitagna ny lalàgna amin’ny fivavahantsena. ⁶ Ka niany die ny fagnantenana ny teny fampagnatenan’Agnahary tamin’ny razantsena no antony itsanganako hitsaraina eto izao. ⁷ Die ny fagnantenana adiasan’ny firenentsena roimbifolo, ze majoto magnano fanompoam-pivavahana ho an’Agnahary andro amanaligna. K’io fagnantenana io no agnedrinkindrehan’ny Jiosy^* an’aha io ry ampanjaka ô! ⁸ Nagnino laha ataonareo raha tsy azo inôna laha Zagnahary manangagna ny mate? ⁹ Aho die efa nandinika tam-poko tato tegnany, fa tsy mety laha tsy magnano raha marobe hanohitra ny agnaran’i Jesosy avy agny Nazareta, ¹⁰ sady natako tagny Jerosalema aby izany, ka maro ny olo masina nataoko tandragno mezigna, laha nahazo fahefana tamin’ny lohan dohan’ny mpisorogna aho, ka laha hovonina areo die mba nandatsa-bato nagneke mandy koa aho. ¹¹ Sady nampijaly an-dreo matetike tamin’ny synagoga^* marobe koa, ka nandrisika an-dreo hamatra ratsy, ka satria very saigna tamin’ny havignirako tamin’azy aho die nagnenjika an’azy hatragny am-belagn’ny tanàna koa.

Mitantara ny niovany fo sy ny asa vitany i Paoly

¹² Ka tamin’ny io laha nenga tàgny Damaskosy aho nitondra ny fahefana mban’ny feo efa azoko tamin’ny lehiben’ny mpisorogna. ¹³ Ka laha tamin’ny roy ambin’ny folo antoandro iny ny andro, a! Ampanjaka ô! Die hitako tan-dalagna teo fa, nisy hajavagna avy tan-dagnitra namirapiratra nagnodidigna an’aha mban’ny akamako niaraka tamin’ahy, ambonimbonin’ny famirapiratan’ny masoandro. ¹⁴ Ka laha lavo tamin’ny tany aby ahay marobe die naharegny feo nijaka tamin’ahy aho amin’ny fijakana Hebreo hoe: Eh! Saoly, Eh! Saoly, nagnino anao laha magnenjika an’Aha? Raha sarotra aminao ny hitsipaka ny fanindrognana. ¹⁵ Die hoy aho an: Kaiza ma Anao azafady^XXX? Die hoy ny Tompo: Izaho no Jesosy henjehinao io. ¹⁶ Mitsangàna anao die mijoroa amin’ny hongotrao f’izany no niboahako taminao: Die ny hanendry anao ho mpiasako sady ho vavolombelogna amin’ny ze efa nahitanao an’Aha, mban’izegny raha niboahako aminao hiboahako ¹⁷ hamonjy anao amin’olo Israely mban’ny olo jentilisa^* izay hanirahako anao. ¹⁸ Hampahiratra ny masony hengany amin’ny mezigna ho agny amin’ny mazava, mban’ny fahefan’i Satana ho amin’Agnahary mba hajahoany famelam-keloka mban’ny lova eo amin’ny izegny namasinina tamin’ny finôna an’Aha. ¹⁹ K’amin’ny izany, a! Agripa ampanjaka ô! Die tsy nandà ny fahitàna avy tan-dagnitra aho. ²⁰ Fa ny nizakaiko vôlongany ny tagny Damaskosy, Jerosalema mban’ny tagny amin’ny tany Jodia manotolo mbany tagny amin’ny jentilisa^* mba hivalo sady hipody amin’ny Zagnahary areo ka hagnano asa magneva ny fivalozany. ²¹ Ka izany no nisamboran’ny Jiosy^* an’ahy tankianjan’ny Tempoly^* sady nifofognany hahafaty an’ahy. ²² Ka noho ny fitahian-Jagnahary an’ahy die mbola ito aho mandraky niany toy, Ka mitory na amin’ny kely na amin’ny lehibe sady tsy mijaka na ino na ino aho afatsy ze nijakain’ny ampaminagny mban’ny Mosesy fa ho avy. ²³ Fa i Kristy tsy mentsy mijaly sady izy no vôlongany hitsangana amin’ny maty, ka hitory fahazavana amin’ny olon’Israely mban’ny jentilisa^*.

Mitaona an’i Agripa hino i Paoly

²⁴ Ka laha avy nagnazava an’izany izy, die hoy i Festosy tamin’ny feo agnambo hoe: E! Paoly! Efa ho môla anao io; ny fianaranaotafahoatrabe loatra io no maka môla anao io. ²⁵ Ka hoy Paoly an: Tsy môla aho a! Festosy havako tsara a! Fa magnazava ny hafatry ny fahamarinana mban’ny fionognana. ²⁶ Fa fantatry ny ampanjaka izany raha izany; ka amin-kasahiana no hijakako eto agnatrehany, fa mino aho fa tsisy mivony amin’azy aby izany satria tsy natao tamin’ny takona. ²⁷ Ry Agripa ampanjaka ô! Mino ny am-paminagny ma anao an? Fantatro fa mino anao. ²⁸ Fa hoy i Agripa tamin’i Paoly: Ha! Ka moramorainao hôtra an’izany ny hampagnekenao an’aha ho Kristiana an!? ²⁹ Ka hoy Paoly: Mangataka amin-Jagnahary aho fa na amin’ny mora na amin’ny sarotra, tsy anao raika mandy fa izegny maharengy an’aha niany n’iza n’iza de hitovy amin’aha afatsy amin’ito gadra ito mandy. ³⁰ De nitsangagna ny ampanjaka, ny Governora niaraka tamin’i Besenika hatramin’izegny niara-nitoboka tamin’azy teo. ³¹ Laha lefa nenga teo izy die nivoria hoe: Tsy nagnano raha hahafaty na hamatorana an’azy io lzalahy io. ³² Die hoy Agripa tamin’i Festosy: Azo alefa mandy i lezalahy io, fany, efa nifidy ny hagnazava eo agnakatrehan’i Kaisara izy.

TOKO 27   ↑

Ny nitondrana an’i Paoly tagny Rôma mban’ny rahazo an’azy tegny an-dalagna

¹ Laha nididina hivarigna andakagna^* henga ho agny Italia ahay, die i Paoly mban’ny ampifatotra saragne natolotra tamin’ny Kapiteny atao hoe: Jolio, tamin’ny ekipan’i Aogosto. ² Ka laha niditra tan-dakagna^* avy agny Andramitena izay efa handeha hitety: Ny sisin-tanin’i Asia ahay die lasa nandeha ka niaraka taminay i Aristarko Makedonianina avy agny Tesalônika. ³ Amaraignan’igny ahay die tonga tagny Sidona. Tsara ny nataon’i Jolio an’i Paoly fa navelany ho agny amin’ny akamany hikarakara an’azy izy. ⁴ Ka laha nenga teo ahay die nagnaraka ny moron’i Kyprosy nahazo ny ilany takondrivotra satria nanohitra ny rivotre. ⁵ Namaky ny ranomasina tagny Kilikia sy Pamfylia ahay die avy tao Myra agny Lykia. ⁶ Die tao no nahitan’ny Kapiteny sambon’i Alexandria anay ho agny Italia, die nafindrany tamin’azy tao ahay. ⁷ Die nandeha niadagna andro maro ahay ka saky tsy avy tandrifin’i Kinido, satria nisakanana-drivotra ahay, die nanara-morogna an’i Kreta tamin’ny ilany takon-drivotra tandrifin’i Salmona. ⁸ Ka laha sahiragna ahay nagnara-morogna die tonga tamin’ny tany atao hoe: Tsarafitodiantsambo, marivo an’io ny tanàna Lasea io. ⁹ Nany ny andro maro anay sady sarotra be ny fandihanan-dakagna^* tamin’ny izay satria efa vita ny andro fifadiana die nagnanatra an’azy Paoly. ¹⁰ Ka nagnano tamin’ny azy hoe: Ry tompokolahy, hitako amin’ny fandihanantsena izao la hisy raha hivetraka eto sady fatiantokabe, tsy amin’ny entagna mandy na amin’ny lakagna^* fa ndre ny aigantsena koa aza. ¹¹ Kanefa ny Kapiteny nino ny ampitondra mban’ny tompon-dakagna^*, fa tsy ny raha nijakain’i Paoly. ¹² Ka satria tsy tsara ny tsiragnan-dakagna^* teo laha itodena amin’ny ririnina, die naleon’ny maro fa tsara laha menga teo sahy mba ho avy agny Foinika mandy mba handanena ny ririnina agny, ny tsiragnan-dakagna^* agny Kreta izany ka magnatrika megnantsimo andrefana sady megnavaratra andrefana.

Ny tafio-drivotra

¹³ Ka laha nandrivotra malefake ny rivotra lahatatsimo, ka nieritreritra izy fa efa nahazo ny raha niriny, die nenga teo izy ka nandalo narivorivo an’i Kreta. ¹⁴ Die tsy ela lafa afaka izany die nandrivotra be nijotso teo ny tafio-drivotra nahery atao hoe: Eorakylona. ¹⁵ Ka laha nofaohin’ny rivotra ny lakagna^* ka tsy hahatohitra an’azy ahay die nabelanay haveziveziny izy. ¹⁶ Ka laha nandeha nalaky nagnaramorogna ny nosy Klaodà nahazo ny ilany takon-drivotra ahay, die saky tsy nahazo ny salopy. ¹⁷ Ka laefa nakarina izany die nifalorany magnodidigna ny lakagna^*, ka nangoaina izy sahy die hifeka agny amin’lay fasika mandrevo die najotso ny lay ka nevelany handeha ho azy ny lakagna^*. ¹⁸ Ka laha novelezin’ny rivotra mafy koa ahay die nagnariane ny entagna ampitson’igny. ¹⁹ Ka ampitson’io koa no nagnaren’ny tagnane mandy ny fanaka tan-dakagna^*. ²⁰ Fa laha tsy nahita masoandro na kintana tagnatin’ny andro maro ahay, die tsy nagnantena ho vôvonjy koa. ²¹ Laha tsy nihinan-kamina elaela areo, die nitsangagna i Paoly tagnivony teo ka nagnano hoe: Ry tompokolahy, dieba tsara, laha niteno an’aha anareo ka tsy nenga tany Kreta mba tsy nahitana an’izao fahasimbana mbana fatiantoka izao. ²² Ka amin’zao die magnanatra anareo aho, mba hatoky fa tsy hisy ho faty anareo, fa ny lakagna^* mandy no ho very. ²³ Fa nisy anjelin’Agnahary izay Tompoko sady tompoiko nitsangana tagnilako teo lahale. ²⁴ Ka nagnano hoe: Aza mangoaigna anao a Paoly fa tsy mentsy hitsangana eo anatrehan’i Kaisara anao. Efa nomen’Agnahary anao ny olo marobe miaraka aminao. ²⁵ Koa matokia anareo tompokolahy fa mino an’Agnahary aho fa ho tonga araka ny vôlajany tamin’aha izany. ²⁶ Nefa tsy mentsy ho fefika mandy amin’ny nosy raika io antsena.

Ny lakagna^* vaky

²⁷ Tamin’ny aligna faha efatra-ambifolo, laha navezivezy tany Andria ahay tamin’ny sasakaligna na die nihevitra ny matilao fa efa marivorivo ny tany izy. ²⁸ Die nandrefy ny halalin’ny rano izy ka hitany fa roapolo refy, ka laha nandrosondroso negnany ahay die mbola nandrefy koa ka hitany fa dimy-ambifolo refy. ²⁹ Die nangoaigna ahay sahy die hidofotra amin’ny harambato ka die nadatsaka vatofatsika efatra tambodilakagna^* ary die nagniry ahay mba haraigna malaky ny andro. ³⁰ Fa tahilefa henga tagnaty lakagna^* ny matilo ka efa nanjotso ny salopy amin’ny ranomasina izy, mody hoe handatsaka vatofantsika tan-dohan’ny lakagna^*. ³¹ Die hoy Paoly: Tamin’ny Kapiteny mbany miaramila raha tsy mitoboka an-dakagna^* eto manafolahy areo, die tsy azo vonjena anareo. ³² Die notapahin’ny miaramila tadyny mahazaka marobe tamin’ny salopy ka navelany ho latsaka. ³³ Ka laha mbola tsy nazava ny andro, die niengavy tamin’ny olo aby i Paoly mba hihinan-kanina ka nagnano hoe: Niany ny andro faha efatra-ambinfolo nandiasanareo, sady nahadignasanareo mosary. ³⁴ Ka magnanatra anareo aho mba hihinan-kanina f’izany koa die agn’isan’ny famonjena anareo, sady tsy hisy very aby amin’nareo na die singam-bolo raika aza. ³⁵ Ka laha avy nijaka an’izay izy sady nandray mofo die nisaotra an’Agnahary teo tagnatrehan’ny olo aby teo, ka lahefa novakiny dia nihinagna izy. ³⁶ Die nahazo toky areo marobe ka nihinagna koa. ³⁷ Enina ambin-fitopolo sy roy-jato ahay marobe tagnaty lakagna^* tao. ³⁸ Laha voky areo die nagnareny agnaty ranomasina ny hanina mba hagnamevagna ny lakagna^*. ³⁹ Ka lefa nazava ny andro die tsy nahita tany maigna areo fa nahita helidrano raike tsara morogna, ka teo no neritreretany nampizanognana ny lakagna^* laha mety amin’ny azy. ⁴⁰ Ka lefa nalainy aby ny vatofantsika die nabelany an-dranomasina tany ary nivahàny ny fehin’ny familian-lakagna^* die novilariny ny lambalay magnatrike mba ho azon’ny rivotra ka die nagnantona ny tany. ⁴¹ Laha avy tamin’ny ze nisy fihôgnan-dranomasina izy die nabelany hidofotra amin’ny tany ny lakagna^* ka ny loha-lakagna^* nijanogna amin’ny tany ka niegnina tsy nihetsika fa ny vodin-dakagna^* koja die vaky natofan’ny onja mahery. ⁴² Die nagnano tetika ny miaramila hamono ny ampifatotre sahy die misy mandogna areo ka ho afaka. ⁴³ Fa ny Kapiteny te-hamonjy an’i Paoly ka nisakagna an-dreo tsy hagnano an’izay fa ze mahay mandagno no nalefany hijotso ho egny amin’ny tany. ⁴⁴ Ka ny sisa die samy hagnano ze hahafaka an’azy, na amin’ny hazo fisaka na amin’ny raha tagnaty lakagna^*. Die tafita sôman-tsara teny an-tanety aby areo marobe.

TOKO 28   ↑

I Paoly tagny Malta

¹ Laha vôvonjy ahay, vao fantatray fa Malta no agnaran’io nosy io. ² Sady tsy kely ny soa nataon’ny tompon-tany taminay; ka nandrehitra afo izy die niresiny tsara aby ahay, sady noragna koa ny andro tao io ka nangatsieke. ³ Die nambely hitaigna entagny raike i Paoly ka narosony tamin’ny afo: Die nisy menaragna^XXXI nivoaka tamin’ny afo ka nagnekitra ny tagnany. ⁴ Ka laha hitan’ny tompony fa rekitra tamin’ny tagnany io biby io die nijaka areo hoe: Mpamono olo tokôtre zalahy io ka ndre vôvonjy tamin’ny ranomasina izy die tsy abelan’ny todin’aigna ho velogna. ⁵ Fa nakifigne ho amin’ny afo biby igny ka tsisy nagnino izy ndre de kely. ⁶ Ka nefa ny olo marobe nagnampo an’azy efa ela fa hivonto na henkarapoka ho faty tampoka izy nefa tsisy raha nanjo an’azy aby na ino na ino, die nova hevitra areo ka nagnano hoe: Zagnahary io. ⁷ Ka narivo an’io teo die nisy sahan’i Poplio. izay mpanapaka ny nosy io nandray anay hivahiny telo andro tao. ⁸ Die narikoditra sady nivalan-dra iaban’i Poplio, die niditra tamin’azy tao i Paoly nivavaka sady nametra-tagnana tamin’azy die nahafaka izy. ⁹ Avy teo die avy ny olo marary sasany tao amin’io nosy io ka die nafaka aby. ¹⁰ Robo rahabe no namen’olo anay tao ka laha nenga ahay die namen-dreo vatsy tsara.

Ho avy agny Rôma i Paoly

¹¹ Lefa afaka telo vologna die nivarigna ahay ka nideba ny sambon’i Alexandria izay nandany ny ririna tamin’ny nosy io sady nisy ny sarin’ny zaza Kambagna^XXXII. ¹² Ka lefa nitody ta Syra ahay die niegnina andro maromaro tao. ¹³ Ka lefa nenga teo ahay die nisompiragna tamin’ny Regioma, ka laha afaka raikandro die nandrivotra be avy tatsimo fa ka ampitson’igny die avy ta Potioly ahay. ¹⁴ Tao ahay nahita ny rahalahy sasagny die nitanany tao fito-andro ahay die hoatran’izany ny nikisahanay ho agny Roma. ¹⁵ Ka laha naharegny ny dianay tagne areo die nitsinjo anay hatamin’ny tsenan’i Apio ta tragnom-bahiny telo ahay. Nahazo toky i Paoly laha nahita an’azy ka die nisaotra an’Agnahary,

Ny Toetr’i Paoly tagny Rôma

¹⁶ mban’ny raha nataony tagny,^XXXIII ka laha avy tao Rôma ahay die navelany hitokagna tamin’ny maramila raike izay miambigna an’azy i Paoly. ¹⁷ Lefa afaka telo andro die nampangalain’i Paoly ny lohandohany tamin’ny Jiosy^* tao, ka laha nivory areo die hoy izy: Eh! Lezalahe, aho anie ka die mifatotre laha Jerosalema natolotra ho an-tagnan’ny Romana ndre die tsy diso^XXXIV tamin’ny firenentsena, na tamin’ny fataon-drazagna. ¹⁸ Ka lafa laha nagnadinkadigna an’ahe mafy areo de saky nandefa an’ahy mandy, satria tsisy raha nataoko ka tokony hahafaty an’ahy. ¹⁹ Ka laha notohefin’ny Jiosy^* izany die tery aho ka nijaka fa handahatra amin’ny Kaisara nefa tsy mba hôtra managna raha hiempangako ny fireneko ndreka. ²⁰ Die izany no nampangalako anareo, hahitako anareo sady hikoranako aminareo; fa nohony fanantenan’ny Israely no nampifehy an’aha amin’ny itoy rojovy toy. ²¹ Die hoy areo tamin’azy: Ahay anie ka tsy mbola naharay taratasy lahata Jodia milaja anao! Sady mbola tsy nisy havana negnatoy nagnambara na nilaja ny raha ratsy nataonao. ²² Fa tienay ho regny aminao izegny mba hevitrao fa laha ny amin’izany antoko zany die fantatray fa efa ratsy laja egny amin’ny tanibe egny izy. ²³ Ka lefa nifamotoagna tamin’azy areo, die maro ny nenga tamin’azy tandragnony tao, sady izy moa nijaka tamin’dreo ny amin’ny fanjakan’Agnahary nanombo tamin’ny nandraign’igny ka mandrapaha sondrogn’andro, sady nijaka ny amin’ny lalagn’i Mosesy mban’ny ampaminagny no nitômany an-dreo hino an’i Jesosy. ²⁴ Ny sasagny nino zegny raha nozakainy, fa ny sasagny tsy mba nino. ²⁵ Ka laha tsy niray hevitra areo die nenga ahay laha nagnano zaka indraim-bava i Paoly hoe: Marina tegnany ny raha nampilazain’ny Fagnahy Masina an’Isaia ampaminagny tamin’ny razagnareo hoe: ²⁶ «Mandihana agny amin’ny ito firenena ito anao, ka zakay hoe: Die mba haharegny fehizay mandy anareo, fa tsy hahalala; sady mba hijaha fehizay mandy anareo, fa tsy hahita; ²⁷ fefa môla ny fon’areo, sady efa maregnindregnina ny tadigniny, efa napiny ny masony sahy de hahita sady haharegny ny tadigniny ka hahalala raha ny fony, die hivalo izy ka hampisava ny aretiny Aho. » (Isaiah 6:9-10) ²⁸ Ôka ho fantatrareo f’izao famonjen’Agnahary zao die nampitondraina ho agny amin’ny Jentilisa^* die ninoane. ²⁹ Ka laha avy nijaka an’izay izy die nenga aby ny Jiosy^*, ka die tena niaragna hevitra tegnany. ³⁰ Die nitoboka roy taogna gagna tan-dragno nofaine tao i Paoly ka nandray an’azy tsara aby zegny olo nenga tamin’azy teo. ³¹ Die nitory ny fanjakan’Agnahary sady nampianatra momba an’i Jesosy Kristy Tompo tamin’ny fahasahiana be izy dy tsisy nanakagna.